MOTORFIETSJOLYT HELP MET PLAASVEILIGHEID
As jy die lawaai en stowwerigheid kan uitstaan, kan jou sak, jou gemeenskap en selfs jou veiligheid baat vind deur die Enduro-motorfietsgemeenskap op jou plaas te verwelkom.
By Roodeberg-boerdery, ’n wyn-, tafeldruif- en steenvrugteplaas tussen Rawsonville en Worcester, was daar op ’n Donderdag laat in Desember verlede jaar ’n groot geraas. Dit is veroorsaak deur die warboel van meer as 100 motorfietsjaers wat al die afgelope twee jaar na Roodeberg kom om hul gunstelingsport te beoefen.
Hierdie warboel val uiteraard nie in elke boer se smaak nie. As jy egter by die geraas kan verbykyk, is daar heelwat voordele wat saam met die motorfietsgemeenskap kom.
Só meen Gerrie van Zyl, eienaar van Roodeberg. Sy seun, CG, kom meld vinnig aan in die koelte waar Gerrie met die gaste uit die stad gesels. CG verdwyn weer net so vinnig in ’n stofwolk saam met ’n klomp maats.
Die genot, samesyn en adrenalien is een van vele redes hoekom Gerrie hierdie motorfietsgeleenthede op sy plaas toelaat.
BOU VERHOUDINGS
“Dit het sowat twee jaar gelede begin met ’n behoefte om iets lekkers saam met my seun te doen wat ons sou toelaat om ’n sterk pa-seunverhouding te bou. Hy het motorfietsry gekies, want daar was nog altyd motorfietse op die plaas en hy is mal daaroor.
“Ons het ons huiswerk gedoen oor die moontlikhede en by die Enduro-gemeenskap betrokke geraak. Die Enduro-gogga het ons albei vinnig gebyt en dit is ’n sport wat ons nog baie jare saam kan doen,” vertel Gerrie.
Enduro-wedrenne is veeleisende, tegniese renne wat meestal op enkelspoorpaaie afgelê word. Dit toets ’n motorfietsryer se tegniese vernuf teen hoë én lae spoed.
Op Roodeberg is daar drie verskillende roeteklassifikasies, naamlik brons, silwer en goud, met goud wat ’n baie moeilike roete is. Op die goue roete moet ryers die Jan du Toitrivier se bedding, waar daar geen pad is nie, baasraak. Daarna loop die roete deur die plaas tot op die Roodeberg waar ryers hul staal teen stadige spoed op steil hellings moet kan toon.
LBWVRA...
GERRIE VAN ZYL
WAT IS DIE BESTE SAKEBESLUIT WAT JY AL GENEEM HET?
Om te diversifiseer na vertakkings buite die primêre landbou, soos ons waterbotteleringsaanleg.
BESTE RAAD WAT JY AL GEKRY HET?
My pa, Christie van Zyl, het my aangeraai om elke dag dieselfde onblusbare geesdrif vir my boerdery en besigheid te behou, al raak dinge soms moeilik.
WAT IS DIE GROOTSTE FOUT WAT JY AL GEMAAK HET?
Om eerste te wees in ’n nuwe bedryf, soos met vye en granate die geval was.
JOU RAAD AS MENSE DIREK MET KETTINGWINKELS WIL SAKE DOEN?
Hou jou oog op jou doelwit, ongeag die aantal minimumvereistes, akkreditasies en regulasies op jou pad.
WATTER TEGNOLOGIE IS ONMISBAAR IN JOU BESIGHEID?
Ek kan nie sonder SenseIt nie, ’n rekenaarstelsel wat die bemesting en besproeiing reguleer en wat ek maklik van my selfoon af kan beheer.