Speen vroeg danksy Byboost
Wanneer die reën wegbly en die lande en weidings nie lyk soos dit moet nie, bied Elanco se Byboost-produkte die nodige voedingstowwe om jou skaapkudde in ’n topkondisie te hou.
Weens droogtetoestande moes mnr. Hennie Geldenhuys sy lammers op ses weke speen, maar danksy Elanco se Byboostprodukte het die lammers steeds uitsonderlik presteer. Geldenhuys boer naby Riversdal in die Wes-Kaap met sowat 1 500 ooie, waarvan die helfte kruisooie is. Hy het vier lamtye per jaar om risiko’s te versprei. Dit is sodat die lammers nie noodwendig na die mark hoef te gaan wanneer pryse laag is nie en sodat hy nie altyd die lammers hoef te voer nie.
Die kruisooie is ’n kruising tussen Vleismerino’s en tweedekudde-Merino-ooie. Die rasegte kudde bestaan uit sowat 700 Merino’s en 200 Vleismerino’s. Vleismerino’s word gebruik om te kruisteel met die tweedekudde-Merino’s en andersom met die Vleismerino’s. Daarna word daar weer met die kruisings gekruisteel.
Geldenhuys moes aan die begin van 2019 se winter, wat weer droog begin het ná drie jaar se droogte, sy lammers noodgedwonge vroeg speen. Met die sny van die lammers se sterte het hy en sy vrou besef daar is nêrens waarheen hy met die lammers kan gaan nie omdat daar nie kos op die lande was nie.
“Hoe voer jy ’n ooi met ’n lam wanneer dit droog is? Dit is onprakties, want jy gaan die een of die ander afskeep.”
Die lammers het reeds op twee weke begin kruipvoeding kry, maar Geldenhuys sê hy kon die besluit neem danksy ’n welkome hupstoot van Byboost.
“Die drie maande oue lammers groei só goed, jy kan dit amper nie glo nie. Die ooie het wonderlik herstel. Hulle is in ’n goeie kondisie en ek kon hulle weer paar. Die feit dat ek die lammers op vier weke oud kon speen, moet ek aan iéts toeskryf.”
OPLOSSING
Die ooie word vier tot ses weke voor lamtyd met Byboost gedoseer en ook vier tot ses weke voor paartyd. Die lammers kry met geboorte 5 ml Byboost. Dit is nou die tweede jaar dat Geldenhuys Byboostprodukte gebruik. Hy gebruik Byboost Skaap en Lam en meng dit om die helfte met Byboost Liquigize Energy Booster.
Sy ooie lam tans op lusernlande. Hy sê indien die droogte sou voortduur en hy nie meer kos op die lande gehad het nie, sou hy in die moeilikheid gewees het. Die ooie vaar egter goed buite.
“Dit is amper soos ’n melkery, want daar is die heeltyd ’n klompie ooie wat lam.”
Hy beoog ook om alle lammers op die ouderdom van twee tot twee en ’n half maande te speen en die nodige kruipvoeding te gee.
Hy sê daar is baie voordele verbonde aan die gebruik van Byboost.
“Die lammers is groter met geboorte, hoewel dit beter bestuur verg omdat dit kan neig tot vassit.”
Die ooie is ook vetter en in ’n beter kondisie. Hy meng sy eie voer van die graan van sy lande wat hy met die hulp van sy Elanco-agent formuleer. Die lammers word afgerond in sy eie voerkraal waar hy selfvoerders gebruik. Geldenhuys sê hy bespaar sowat R1 000 per ton indien hy self sy voer meng. Dit sluit mengkoste in.
Die rasegte ooie word kunsmatig geïnsemineer en die kruisooie word natuurlik gepaar.
Hy het weiding en natuurlike veld in die vorm van suur- en duineveld. Hoewel die Merino-ooie goed vaar op weiding, presteer die Merinokruisings en Vleismerino’s weer beter op die veld. Die boerdery is ’n gemengde boerdery. Hy saai 300-450 ha graan en plant jaarliks sowat 150 ha lusern.
“Ons mikpunt is om altyd twee derdes van die grond onder lusern te hou omdat ons primêre inkomste skape is.”
Geldenhuys sê die skaapboerdery bied hom meer gerusstelling as die saaiboerdery.
“Dit gee my meer sekerheid as ek vir die bankbestuurder kan sê hier is 500 dragtige ooie wat gaan lam, as om 100 ha se koring te saai omdat ek nie verseker weet hoeveel ton ek gaan oes nie.”