‘Geen rede tot kommer oor fopvleis’
DIE tradisionele vleisbedryf het tans geen rede om wakker te lê oor die produksie van plantgebaseerde burgers en ander alternatiewe vir vleis nie, aldus nuwe navorsing.
Die navorsing wat deur die Ohio-universiteit gedoen is, toon dat terwyl die verkope en markaandeel van die nuwegeslag plantgebaseerde fopvleis in onlangse jare gegroei het, daardie wins nie gelei het tot verminderde besteding op dierlike vleisprodukte nie.
Oorkoepelend het ’n ontleding van vleisaankope onthul dat plantgebaseerde vleis hoofsaaklik as bykomend tot beesen varkvleis gesien word, terwyl daar ’n neiging is om hoendervleis, kalkoenvleis en vis met die plantgebaseerde produkte te vervang.
Luidens die navorsers hou die alternatiewe vleis nie ’n bedreiging vir tradisionele vleis in nie, want mense vervang nie hul vleis daarmee nie. Hulle koop dié soort produkte saam met hul bees- en varkvleis.
Weeklikse data van die Nielsen-instituut van die eerste week in Januarie 2017 tot die tweede week in Julie 2020 op varsvleisbesteding by verskeie winkels reg oor 40 Amerikaanse state is vir die navorsing ontleed.
Die kategorieë het plantgebaseerde vleisalternatiewe, bees-, hoender-, kalkoen-, vark-, vars vis, lams- en eendvleis ingesluit.
Die resultate het getoon plantgebaseerde vleisalternatiewe het slegs 0,1% van die gemiddelde totale uitgawes op vars vleis tydens die studieperiode behels – hoewel die alternatiewe se bemarkingsaandeel tot 0,4% gestyg het. Beesvleis was boaan die varsvleiskategorie met 46%, gevolg deur hoender met 23%, varkvleis en vis met ongeveer 12% elk, terwyl kalkoen en ander vleissoorte minder as 5% van varsvleisverkope behels het.
Beesvleis en vleis-alternatiewe was die keuses wat die duurste was.
Van al die keuses wat bestudeer is, het uitgawes op plantgebaseerde produkte die meeste gestyg wanneer daar spesiale aanbiedinge op die produkte was.
Verlaagde bees- en hoendervleispryse het die vraag na plantgebaseerde vleis verlaag, maar laer pryse van fopvleis het nie veel van ’n uitwerking op die vraag na dierlike proteïenbronne gehad nie.