GESONDER KOS VANDAG MOONTLIK DANKSY WETENSKAP
Twee boere het tydens die twaalfde Nasiein-gesprek-reeks op die Nampo-oesdag gesê hoewel hulle die gebruik van chemikalieë afgeskaal het, hulle dit nog nie ten volle kan uitsluit nie. Hulle het beklemtoon hoe belangrik die korrekte gebruik daarvan is.
Mnr. Jaco Minnaar van die plaas Uitsny in die distrik Hennenman het gesê chemikalieë soos gif en kunsmis is ’n belangrike komponent van boerdery, maar kan giftig wees as te veel gebruik word.
“Ek is die derdegeslagboer op die plaas en my seun gaan die vierde geslag wees. Ons boer met ’n visie vir die volgende 50 tot 60 jaar, en moet ons besluite daarop grond. Ons kan wel nie die gebruik van chemikalieë totaal laat vaar nie, want sommige onkruid kan nog dekades in jou grond voorkom.”
Mnr. Egon Zunckel, direkteur van Zunckel Farms, het gesê hulle pas die afgelope 28 jaar geenbewerking op hul plase toe. Hoewel hulle in baie noue samewerking met die natuur boer, kan hulle nie heeltemal van die gebruik van chemikalieë wegbreek nie.
“Die Here het die natuur volmaak geskape. As daar ’n probleem in die grond is, is dit omdat ons dit versteur het.”
Hy het gesê hulle probeer sover moontlik natuurlike metodes vind om versteurings te herstel, maar chemikalieë is soms die enigste antwoord.
Mnr. Kobus Meintjes, president van CropLife Suid-Afrika, het gesê opleiding en voogdyskap oor die verantwoordelike gebruik van chemikalieë deur produsente is uiters belangrik. “Dit is wel belangrik dat verbruikers die waarheid moet weet oor die gebruik van chemikalieë in die produksie van gewasse en kos.”
Volgens dr. Klaus Eckstein, uitvoerende hoof van Bayer Suider-Afrika, produseer boere vandag danksy wetenskap en tegnologie die gesondste kos nóg.
“Die deursigtigheid in die voedselproduksiestelsel is só hoog dat jy aan standaarde moet voldoen vir die verbruiker wat wil weet of sy kos volhoubaar en gesond geproduseer word.”
Tafeldruiwe kan byvoorbeeld deesdae met behulp van die wetenskap só geproduseer
word dat dit weke lank per skip na ’n ander wêrelddeel vervoer en daar steeds verbruik kan word. Honderd jaar gelede was dit onmoontlik.
Eckstein het gesê wanneer ’n nuwe produk ontwikkel word, moet winsgewendheid en volhoubaarheid in balans bly. “Ons kyk na ’n nuwe produk se impak op die natuur, onder meer bye en water, maar ook wetenskaplik sodat die regte middels die gewas op die regte tyd bereik.”
Die tydsverloop van tegnologiese ontwikkelings en die burokrasie met regulatoriese prosesse is wel problematies.
Minnaar het gesê danksy beskikbare geneties gemodifiseerde organismes kan boere minder chemikalieë gebruik. “Ek gebruik deesdae minder plaagdoders as 15 jaar gelede. Ek stem saam, ons kos is nou veiliger as voorheen.”
Eckstein se antwoord op diegene wat glo dat kos voorheen veiliger was, is: “Wat doen jy om ’n groeiende wêreldbevolking te voed op dieselfde hoeveelheid grond? Jy produseer met meer ywer met minder, maar gesonder. Dit is presies wat ons doen. En hoekom sê ons so? Want jy kan nou meer en meer meet en wetenskap in die grond toepas deur die oë van ’n boer.”