WÊRELDKLASONDERRIG — nou oral beskikbaar
Dink net hoeveel die landbou oor die afgelope 100 jaar verander het. Slimtoestelle en dataontleding word gebruik, soos in die meeste ander bedrywe waar kinders in die toekoms gaan werk.
DIE feit dat kinders steeds op dieselfde manier skoolgaan as in die verlede, het hulle aangespoor om Die MOS-stelsel vir toekomsgereedheid te ontwikkel, sê mnr. Roedolf van der Westhuizen, uitvoerende hoof van Die MOS-Inisiatief.
As boere is een van die grootste voorregte die pragtige dele van Suid-Afrika wat ’n mens “kantoor’’ kan noem. Daar is byvoorbeeld die subtropiese vrugtebedryf in die Laeveld, die lang gras van die Bosveld se wild- en gewasboerderye, of Witrivier se tropiese vrugte, makadamianeute en groente.
Histories sou dit egter gereeld vir boerefamilies nodig wees om hul kinders na kosskole in omliggende stede te stuur om gehalteonderrig en -opvoeding te verseker. Daardie dae is verby – met MOS-Wêreldwyd, Suid-Afrika se Afrikaanse aanlyn tuisskool van die toekoms, kan kinders nou in die gemak van hul ouerhuis topgehalte-onderrrig ontvang.
Die MOS-Wêreldwyd-stelsel, as deel van Die MOS-Inisiatief, is gegrond op die jongste internasionale navorsing. Die stelsel beklemtoon die volgende bevoegdhede: kritiese denke, kreatiwiteit, kommunikasie, saamwerk, burgerskap en karakterbou. Die klem is dus nie op ’n spesifieke uitkoms nie, maar om deur hierdie vaardighede voorbereid en toegerus te wees vir ’n onseker toekoms.
Die gebruik van tegnologie binne die MOS-model is sentraal tot sy sukses. Van der Westhuizen beklemtoon dat die tradisionele wyse waarop onderrig steeds in die meeste skole plaasvind, nie voldoende is vir die wêreld waarin kinders eendag moet funksioneer nie.
MOS-Wêreldwyd-leerders het slegs ’n rekenaar, ’n goeie internetverbinding en ’n rekenaarkamera (vir groepswerk en kontaksessies) nodig om deel te word. Leerders werk op hul eie tyd en teen hul eie pas, maar het toegang tot leerbestuurders en vakkundiges indien hulp benodig word. MOS-Wêreldwyd moedig leerders ook aan om by mekaar te leer voordat personeel noodwendig gekonsulteer word.