Nuwe tegnologie op Val-boeredag te sien
AFGRI Equipment is die grootste verskaffer van John Deere-masjiene buite Noord-Amerika en sal vanjaar vir die eerste keer John Deere se nuwe 8R-trekker demonstreer.
Sedert die begin van die Val-boeredag, meer as twee dekades gelede, is werktuigdemonstrasies deel van die kern van dié dag. Dit vind elke jaar op die eerste Woensdag van Julie op Val in Mpumalanga plaas en lok duisende besoekers. Weens covid-19 is dié boeredag die afgelope twee jaar nie aangebied nie. Dit is dus ’n gebeurtenis waarna boere en demonstreerders baie uitsien.
Vanjaar se Val-boeredag sal die eerste geleentheid wees waar besoekers die nuwe John Deere 8R-trekker in aksie sien.
“Hierdie trekkers is al beskikbaar sedert 2020, maar weens die pandemie was daar min geleentheid om sy vermoë te bewys. Nuwe spuittegnologie vanaf John Deere, soos Exactapply, en baie ander produkte vanaf ons wêreldklas verskaffers soos Lemkem en Rovic Leers, asook Amazonestrooiertegnologie sal te sien wees. Daar kan selfs ook ’n verrassing of twee wees,” sê mnr. Etienne Meyer, bemarkingsbestuurder by AFGRI Equipment.
“Hierdie jaar sal ook die eerste Val-boeredag wees waar ons boere John Deere-boutoerusting en kompakte Wacker Neuson-boutoerusting van nader kan bekyk.”
Die boeredag bly vir landboumasjineriemaatskappye belangrik omdat dit vir boere die kans bied om die werktuig in hul tipe grond in aksie te sien. Dit bied ook vir landboumaatskappye die kans om klanteverhoudinge te smee.
“Dit is vir ons uiters belangrik om ’n goeie verhouding met ons klante te hê. Ons voel dit is nodig om in persoonlike kontak met ons klante te wees om agter te kom wat die markbeweging is ten opsigte van nuwe metodes en tegnologie.
“Dit is ook belangrik om te weet watter geleenthede daar is om pasgemaakte waardetoevoegings te kan bied.
“Ons glo ná al die inperkings wat die pandemie veroorsaak het, is almal lus vir ’n bietjie gesels en lekker kuier! Ons is beslis reg,” sê Meyer.
Die Val-boeredag is tans een van die grootste boeredae en moontlik die grootste demonstrasiedag in Suid-Afrika.
“Min boeredae bied deesdae die geleentheid vir demonstrasies, maar met Val is dit die kerneienskap en vir ons is dit van die hoogste waarde.
“As toerustingverskaffers is dit vir ons belangrik om klante bekend te stel aan die jongste tegnologie wat beskikbaar is om boerdery in Suid-Afrika te bevorder. Sodra die demonstrasies begin, klap die tonge tussen die boere, vriende en bure oor hoe die toepassings op hul plase sal vaar. Dit is vir ons baie lekker.
“Niks word op Val verkoop nie, maar ons is baie besig met boerebesoeke vir minstens ses weke ná van die demonstrasiedag,” sê Meyer.
Hy sê hoewel demonstrasies die grootste klem van die boeredag is, bied AFGRI Equipment vanjaar meer, waaronder John Deere-klere en -speelgoed, na-verkopediens-aanbiedinge en die nuwe e-Commerce-webblad vir die verkoop van John Deere-onderdele.
“Daar is vanjaar baie meer om na uit te sien,” sê Meyer. “Ons hoop om jou daar te sien en lekker saam te kuier. Kom ervaar die AFGRI Equipmentvoordeel!”