Byvoegmiddels maak die verskil in stryd teen onkruid
Met onkruid wat toenemend weerstandbiedend word, asook ongunstige weerstoestande, bereik baie onkruiddoders selde hul volle potensiaal. Innoverende strategieë is dus nodig om onkruiddoders se leeftyd te verleng en die ontwikkeling van weerstand te beperk.
Die gebruik van byvoegmiddels kan ’n verskil in die bekamping van onkruid maak. Die werking van twee swaksuur-onkruiddoders, glifosaat en glufosinaat, kan hierdeur beduidend verbeter word. Glifosaat en glufosinaat is albei nie-selektiewe, ná-opkoms onkruiddoders wat eenjarige en meerjarige grasse, asook breëblaaronkruid, bekamp.
GLIFOSAAT
Glifosaat inhibeer die werking van die EPSPS-ensiem in plante. Hierdie ensiem is verantwoordelik vir die produksie van noodsaaklike aminosure waarsonder ’n plant nie normaal kan funksioneer nie. Wanneer die onderdrukking van die ensiem ’n kritieke vlak bereik, vrek die onkruid.
As sistemiese produk is die werking van glifosaat afhanklik van doeltreffende opname en translokasie in die plant. Swak opname en translokasie belemmer dus die werking van glifosaat.
GLUFOSINAATAMMONIUM
Glufosinaat-ammonium is hoofsaaklik ’n kontak-onkruiddoder met beperkte sistemiese aktiwiteit. Glufosinaat bied goeie bekamping teen glifosaatweerstandbiedende onkruid, soos Lolium en Conyza.
Glufosinaat inhibeer die plant-ensiem glutamien-sintase, wat lei tot die inhibering van fotosintese en die belemmering van ammoniak-metabolisme. Die staking van fotosintese, tesame met die opbou van ammoniak, het ’n toksiese uitwerking wat daartoe lei dat die onkruid vrek.
Vir doeltreffende bekamping moet glufosinaat op aktiefgroeiende onkruid toegedien word omdat dit slegs ’n werking op groen plantdele het.
Omdat glufosinaat ’n kontakwerking het, is bedekking uiters belangrik. Daarom word ’n watervolume van minstens 300 liter/ha aanbeveel.
Die aanbevole dosis van albei onkruiddoders hang af van die onkruidspesie en die groeistadium daarvan, asook omgewingstoestande. Verwys dus altyd na die etiket van die gekose produk vir meer inligting.
BEKAMPING MET BYVOEGMIDDELS
Die ontwikkeling van nuwe produkte vir onkruidbekamping word ál meer aan bande gelê, wat meebring dat die oplossings wat wel beskikbaar is,
VOLG AANBEVELINGS
NOUKEURIG. Die gehalte van die water wat in spuitmengsels gebruik word, is uiters belangrik.
so doeltreffend moontlik aangewend moet word.
Dit is waar byvoegmiddels boere die geleentheid kan gee om die maksimum opbrengs op hul belegging met onkruiddoders te kry.
Byvoegmiddels kan in drie spuitfases die doeltreffendheid van onkruiddoders verbeter, naamlik in die tenk, in die lug en op die teiken. Die regte byvoegmiddel en die regte praktyke moet in elke fase gevolg word om doeltreffendheid te verseker.
IN DIE TENK
Diegehaltevandiewaterwat in spuitmengsels gebruik word, is uiters belangrik omdat dit die
draer is van die produkte wat die werk moet verrig en dus die doeltreffendheid bepaal.
Dikwels bestee boere al hul tyd of aandag daaraan om die geskikste pH vir die spuitmengsel te verseker. Selfs al is die pH van die water perfek, kan die gehalte steeds nie na wens wees vir die spesifieke onkruiddoder wat toegedien moet word nie.
Die elektriese geleidingsvermoë (EG) is net so ’n belangrike aspek van watergehalte as die regte pH. Die EG van water dui die soutinhoud aan. Hierdie soutinhoud sluit katione soos kalsium, magnesium, natrium en kalium in. Glifosaat en glufosinaat word albei deur opgeloste katione in die spuitwater benadeel. Daarom is dit belangrik om die antagonistiese katione te bind voordat dit hierdie twee onkruiddoders benadeel. Spuitgraad-ammoniumsulfaatbyvoegmiddels word dikwels vir dié doel aanbeveel. Maak dus seker die etiketaanbevelings vir watergehalte word noukeurig gevolg.
IN DIE LUG
Met die toediening van glifosaat en glufosinaat word doeltreffendheid as vanselfsprekend aanvaar. Die spuitdruppel ondervind egter ’n aantal hindernisse voordat dit die teiken bereik. Die formulering van die produk is ’n faktor wat druppelgrootte en dus die doeltreffendheid van toediening kan beïnvloed. Die spuitdruk en tipe spuitpunt kan ook die druppelgrootte beïnvloed.
As die druppel te groot is, is dit geneig om van die teiken – die blaaroppervlak – af te spat. Druppels wat te klein is, verdamp nog voordat dit die teiken bereik het.
In albei gevalle is daar dus geen langdurige kontak tussen die blaaroppervlak en die onkruiddoder nie, en die boer se belegging val op die grond of waai in die wind weg.
Die toedieningsdosis van hierdie twee onkruiddoders word dus beïnvloed, wat die doeltreffendheid benadeel. Sekere byvoegmiddels, naamlik die neerslaghulpmiddels, kan klein druppels in die spuitpatroon groter maak en terselfdertyd groot druppels onveranderd laat. Die voordeel hiervan is ’n eenvormiger druppelgrootte en ’n groter kans dat meer druppels die teiken gaan bereik. Daar is dus minder verdamping en wegdrywing, en meer van die produk dring die blaredak binne en bereik die teiken oral.
OP DIE TEIKEN
Selfs as die onkruiddoder-bevattende druppel op die blaar behou word, is opname nie verseker nie, want daar kan steeds ’n hindernis tussen die onkruiddoder-druppelresidu en die blaaroppervlak wees. Dit kan egter met doeltreffende druppelverspreiding oorkom word. ’n Waslagie of hare op die blaaroppervlak kan ’n versperring tussen die druppel en die blaar veroorsaak. Dié lagie verskil tussen gewasse en onkruide, en by sommige onkruide is albei goed ontwikkel.
’n Doeltreffende benatter verander die eienskappe van die spuitdruppel, onder meer deur die oppervlakspanning te verlaag. Dit vergroot die waarskynlikheid dat druppels op die blaaroppervlak behou word en die haar- en waslagie kan deurdring. Sodra die druppel wel op die blaar beland, moet dit ook vir so lank moontlik vogtig bly om ’n maksimale opnametyd moontlik te maak.
Wanneer die doeltreffendheid van glifosaat- en glufosinaat-toediening verhoog word, maak die boer seker dat sy belegging in onkruidbekamping goeie vrugte afwerp. Byvoegmiddels wat korrek aangewend word, kan die verskil beteken tussen aanvaarbare en onaanvaarbare bekamping.
Gebruik altyd die aanbevole byvoegmiddel op die etiket vir maksimale onkruidbekamping.
Hierdie artikel is deur Villa Crop Protection verskaf.