VRYSTELLING VAN METAANGAS KÁN VERLAAG WORD
Huidige strategieë kan vee se metaangasvrystellings genoeg verlaag om die beesvleisbedryf in staat te stel om sy bydrae ten opsigte van die vrystelling van kweekhuisgas te beperk.
In ’n ontleding het me. Claudia Arndt van die internasionale veenavorsingsinstituut in Kenia saam met verskeie kenners van reg oor die wêreld honderde studies van eweknieë bekyk. Die studies is daarop gemik om die produk-gebaseerde en metaangasvrystellings van herkouers te verminder.
Die span het bevind veeproduksie kan help om die vrystelling van kweekhuisgasse te beperk indien die geïdentifiseerde en doeltreffendste verlagingstrategieë ten volle ingestel word.
Bykomende strategieë moet ingestel word om doelwitte teen 2050 te bereik, aangesien daar verwag word dat die vraag na veeprodukte gaan toeneem.
Mikrobes in herkouers se spysverteringskanaal ontbind en fermenteer voer, ’n proses wat enteriese fermentasie genoem word en metaan as neweproduk produseer.
Die wêreld se meer as drie miljard herkouers stel die metaan vry wanneer hulle winde opbreek en dra sodoende tot 30% van internasionale antropogeniese metaanvrystellings by.
Ongeveer die helfte van diereproteïene word deur herkouers vervaardig. In lande met lae en middelinkomste (waar 84% van die wêreld se bevolking leef), speel herkouervee ’n belangrike rol in voedselsekerheid.
Daarenteen is die verbruik van dierlike proteïen in lande met hoë inkomste dikwels bo die aanbevole vlak.
Weens die meervoudige gebruik van herkouers en hul bydrae tot volhoubare ontwikkelingsdoelwitte, het die outeurs van die studie gekyk na strategieë wat enteriese metaanprodusie kan beperk sonder om diere se produktiwiteit te belemmer.
Hulle het drie strategieë geidentifiseer wat metaanvrystelling per eenheid vleis of melk met gemiddeld 12% kan verlaag, terwyl die diere se produktiwiteit verhoog word.
Dit is verhoogde vlakke van voerinname, om herkouers op minder volwasse gras te laat wei, en om herkouers verhoogde vlakke van konsentrate te voer.
Verder het hulle vyf strategieë geïdentifiseer wat die produk-gebaseerde vrystellings nie net met 17% kan verlaag nie, maar metaanvrystellings met gemiddeld 21% kan verlaag, terwyl die produktiwiteit van die dier behou word. Die strategieë sluit in om metaanonderdrukkers, olie en vette, oliesade of nitrate as byvoeding vir diere te gee, asook om herkouers met plante te voer wat ryk is aan tanniene.
In Europa is veelvuldige scenario’s gevind wat nie die volle inwerkingstelling van die doeltreffendste strategieë verg om die 2030-teikens te bereik nie, terwyl die volle inwerkingstelling van die doeltreffendste strategieë dit moontlik sal maak om die 2050-doelwit te behaal.
In teenstelling daarmee is bevind dat hoewel aansienlike dalings in Afrika behaal kan word, die strategieë nie voldoende sal wees om die mikpunte vir 2030 of 2050 te behaal nie.
Dit is omdat Afrika se groeiende bevolking en vraag na diereprodukte per kop na verwagting tot ’n aansienlike toename in veeproduksie en kweekhuisgasvrystellings sal lei.
Die verwagte toename is egter steeds heelwat laer as Europa se vraag per kop.