DIÉ WEEK IN DIE LANDBOU
LIG IN DIÉ TONNEL?
Die staat en nasionale dieregesondheidsforum stem saam dat samewerking met en die betrokkenheid van die private sektor nodig is om die tekort aan noodsaaklike, strategiese entstowwe uit die weg te ruim, dat kuddeimmuniteit reeds benadeel is en dat onmiddellike optrede nodig is. Die forum en departement van landbou, grondhervorming en landelike ontwikkeling sê in ’n gesamentlike verklaring hulle het ooreengekom dat wetgewing hersien sal word om die private sektor betrokke te kry.
SIKLONE BROEI
Tropiese stormaktiwiteit en selfs siklone kan in die komende twee maande ontwikkel in die lig van stygende temperature in die westelike Indiese Oseaan. Die hoër temperature lei tot die ontstaan van tropiese laagdrukstelsels rondom Madagaskar en die Mosambiekkanaal, volgens mnr. Johan van den Berg, landbouweerkundige. “Omdat die hoogtepunt van die tropiese-sikloonseisoen rondom Februarie en Maart is, is die kans baie goed dat tropiese stormaktiwiteit en selfs siklone in die komende twee maande kan ont
wikkel. Dít kan bydra tot toestande van ondergemiddelde reënval oor die suidelike dele van Afrika en vloede oor Oos-Afrika.”
BENOUDE SPRONGE
Die internasionale eierkommissie (IEC) en internasionale pluimveekommissie (IPC) het onlangs ’n beroep op die internasionale bedryf en regerings gedoen om inenting teen hoogs aansteeklike voëlgriep toe te laat en ook stappe te doen om die risiko te versag van handelsversperrings wat daaruit voortvloei. Dit kom
nadat die siekte sedert vroeg 2022 onverwagse patrone begin volg het, berig Poultry World.
Dit was tot in 2004 ’n hoogs ongewone verskynsel, maar sedert 2014 ’n jaarlikse verskynsel. In die 2021-’22-seisoen het die grootste epidemie nóg in Europa voorgekom.
SIDER-AFGUNS
Die rede hoekom Suid-Afrikaanse Brouerye skop teen ’n belangrike voorwaarde vir die samesmelting van die drankmaatskappye Distell en
Heineken is omdat hy eintlik hul winsgewende siderhandelsmerke Hunter’s en Savanna wil hê. Só berig Netwerk24 oor ’n bespreking van dié samesmelting voor die Mededingingstribunaal verlede maand. Ingevolge die samesmeltingsvoorwaardes moet Distell en Heineken van die Strongbow-siderhandelsmerk ontslae raak, maar SAB stel nie daarin belang nie weens Strongbow se klein markaandeel.
KLIMAAT-KOMMER
Soos in 2022 word verwag dat die klimaat vanjaar weer ’n groot faktor in kommoditeitspryse sal wees, sê The Economist se invloedryke intelligensie-eenheid. Koringproduksie in Noord-Amerika en Europa het swaar gely onder die versengende hitte, en weens klimaatsverandering kom katastrofiese weergebeurtenisse al hoe meer voor. ’n Derde agtereenvolgende jaar van La Niña gaan nadelig wees vir mielie- en sojaboonproduksie in die Europese Unie in die eerste helfte van die jaar, tesame met ander belangrike landboukommoditeite soos suiker en koffie. Hoë aardgaspryse weens die oorlog in Oekraïne is nadelig vir nywerheidsuitsette.