Wysigings van regulasies vereis navorsing
Belanghebbendes in die graanbedryf kon nie konsensus bereik oor veranderinge aan die mielie graderings regulasies nie. Gevolglik bly die regulasies onveranderd.
Die departement van landbou, grondhervorming en landelike ontwikkeling het ’n versoek ontvang om die mielie graderings regulasies te wysig. Die bedryf s verteenwoordigers, soos Graan SA, Agbiz Grain, die NCM, Sacota en Afma, is versoek om teen einde November 2022 kommentaar op die voorgestelde wysigings in te dien. Die departement het op 17 Januarie 2023 met die belanghebbendes vergader. Hulle kon nie konsensus oor die wysigings bereik nie.
Daar is onsekerheid of die navorsing voldoende is om die voorgestelde wysigings te ondersteun en die gebrek aan konsensus het die besluit van die departement bepaal. Klem is daarop gelê dat wetgewing verbruikers se voedsel veiligheid vooropstel. Enige voorgestelde wysigings van ’n graderingsfaktor wat die voorkoms van mikotoksiene kan verhoog, word onder die vergrootglas geplaas. Die opbergingsektor het die volgende kommentaar op die voorgestelde wysigings ingedien.
GEBREKKIGE PITTE
Die definisie van gebrekkige mieliepitte moet as volg gewysig word: Gebrekkige pitte is pitte wat verskrompel, duidelik onvolwasse, rypbeskadig, hittebeskadig of met swamme besmet is. Die woorde “waterbeskadig”, “muf” en “krytagtig” moet uit die definisie verwyder en deur “met swamme besmet’’ vervang word.
WATERBESKADIGDE MIELIEPITTE
Weens die gebrek aan konsensus tussen produsente en verwerkers was die opbergingsektor van mening dat daarby volstaan moet word dat waterbeskadigde pitte nie as gebrekkig beskou moet word nie. In dié stadium is die impak van waterbeskadigde mielies op langtermyn-opberging onbekend.
Voldoende navorsing moet eers aandui dat waterbeskadigde pitte deur swamme besmet is en tot groter risiko vir graan in opberging, verwerking en vir die eindverbruiker lei. Dan eers kan waterbeskadigde pitte as gebrekkig beskou word.
Op hul beurt meen verwerkers dat waterbeskadigde mielies as gebrekkig beskou moet word tot relevante navorsingsprojekte die teendeel bewys.
Onafhanklike graangradeerkundiges, sonder affiliasie of indiensname by produsente, opbergers, handelaars of verwerkers en met jare lange praktiese graderingservaring, het in ooreenstemming reeds teen November 2021 beklemtoon dat waterbeskadigde mielies as gebrekkig beskou moet word.
MET SWAMME BESMET
Die opbergingsektor se aanbeveling dat “met swamme besmet’’ tot die definisie vir gebrekkige of gebrekkige pitte gevoeg moet word, is uiters belangrik.
Só word verseker dat indien voldoende ondersoeke of navorsing in die toekoms voldoende bewyse oplewer dat waterbeskadigde, verkleurde mieliepitte en koffiegevlekte mieliepitte die oorsaak van swambesmetting is, behoort dit as gebrekkige pitte geklassifiseer te word. Die opbergingsektor het verder aanbeveel dat waterbeskadigde, verkleurde, oksidasiegevlekte, koffiegevlekte en verrooide mieliepitte nie as gebrekkig beskou moet word nie tot die teendeel deur voldoende ondersoeke of navorsing bewys word.
Die definisie “met swamme besmet” sluit mielies in waarvan die pitte of stukkies pitte sigbaar met swamme besmet is, en wat swart, blou, groen, geel of wit swamgroei op enige plek op die pit toon of swamgroei onder die semellaag van die pit toon. Pitte wat met Fusarium besmet is, word gekenmerk deur rooi, pienk of bruin verkleurings. Die pitte is gedeeltelik tot heeltemal besmet.
Die opbergingsektor het aanbeveel dat die term “muf” vervang moet word deur “met swamme besmet’’ om die definisie te verbeter. “Gemuf’’ beteken bedek met ’n swamgroei wat verrotting veroorsaak, vanweë ouderdom of klam toestande. “Met swamme besmet” beteken aangetas met ’n siekte wat swamme veroorsaak, of besmet met skadelike swamme.
Die volgende voorstelle is ook vir die wysiging van die definisies vir verkleurde en rypbeskadigde pitte ingedien.
VERKLEURDE MIELIEPITTE
“Verkleurde mieliepitte” beteken mieliepitte wat as gevolg van omgewingstoestande aan albei kante van die pit verkleur is, uitgesonderd verrooide mieliepitte, koffiegevlekte mieliepitte en oksidasie gevlekte mieliepitte. Die opbergingsektor meen verkleurde mieliepitte hoef nie meer as 25% aan albei kante van die pit verkleur te wees om as verkleurde mieliepitte beskou te word nie.
RYPBESKADIGDE PITTE
“Rypbeskadigde” mieliepitte word gekenmerk deur twee of meer van die volgende: ’n dowwe bruin verkleuring vanaf die aanhegtingspunt, ’n onderontwikkelde endosperm in verhouding tot die kiem en/of die perikarp het blasies of skilfer af.
TEN SLOTTE
Die proses om die graderings regulasies te probeer wysig, het die belangrikheid van navorsing opnuut beklemtoon. Voldoende navorsing en ondersoeke waarvan die resultate nie deur die belanghebbendes in die waardeketting betwis kan word nie, is uiters belangrik om die soeke na konsensus te ondersteun.
Die departement van landbou, grondhervorming en landelike ontwikkeling sal nie wysigings aan die graderings regulasies goedkeur voordat die onderskeie verteenwoordigers van elke sektor konsensus daaroor bereik het.
Mnr. Wessel Lemmer is hoofbestuurder van Agbiz Grain.