PLASE GAAN ONTEIEN WORD
Die Nederlandse regering het einde verlede jaar aangekondig hy gaan tot 3 000 “spitsbesoedelaar-plase” en groot nywerheidsbesoedelaars uitkoop in ’n poging om ammoniak- en stikstofoksiedvrystellings, wat ingevolge Europese Unie-wetgewing onwettig is, te verminder. Hiermee probeer hy sy planne deurvoer om honderde plase uit produksie te dwing om stikstofoksiedvrystellings te verminder.
Me. Christianne van der Wal, minister van natuur en stikstofbeleid, het gesê boere sal meer as 100% van die waarde van hul plase aangebied word om op te hou boer. Die Nederlandse regering het nou vir die eerste keer pertinent te kenne gegee dat gedwonge onteiening vanjaar sal volg as die huidige vrywillige maatreëls aanhou misluk.
Die spitsbesoedelaars – meestal boere – sal ’n finale lys keuses aangebied word: Innoveer om vrystellings aansienlik te verminder, gaan oor na ’n nuwe soort besigheid, brei uit sodat dit hul impak op die omgewing verminder, hervestig, of hou vrywillig op boer.
“Vir landbou-entrepreneurs sal daar ’n uittreeskema wees wat so aantreklik moontlik sal wees,” het Van der Wal in parlementêre inligtingsessies gesê. “Vir nywerheidsbesoedelaars sal ons aan die werk kom met ’n pasgemaakte benadering en die verskerping van permitte. Ná ’n jaar sal ons sien of die doelwitte genoegsaam bereik is of nie.”
Die jongste aankondiging volg op maande se woedende boerebetogings, sterk steun vir ’n nuwe pro-boereparty, gespanne onderhandelinge en ’n verslag van 58 bladsye genaamd Wat ons kan doen deur die parlementslid mnr. Johan
Remkes. Ondanks vorige vrywillige uitkoopskemas het net sowat 30 boere opgehou boer.
Nuwe syfers toon egter veegetalle het die afgelope dekade min of meer dieselfde gebly, met meer as vyf keer soveel plaasdiere in Nederland as sy 17,8 miljoen mense. Boere is gevolglik opnuut woedend oor die jongste beoogde aksie van die regering. Die Boer Burger-beweging het gesê dit is verstommend dat boere en hul gesinne nóg ’n jaar in onsekerheid en afwagting moet voortleef.
Omgewingskenners is versigtig optimisties. Me. Natasja Oerlemans, hoof van die voedselspan by WWF Nederland, het gesê hoewel boere nie blameer kan word vir die navolging van die bestaande produksiestelsels nie, was hervorming al jare lank nodig. “Dit kan tot ’n belowende pad vir die broodnodige landbou-oorgang in Nederland lei, maar dis onseker hoe die regering die onteiening gaan afdwing indien sy vrywillige benadering nie die gewenste uitwerking het nie.”
Die aanvanklike planne om die land se stikstofvrystellings teen 2030 te halveer, het vroeër in 2022 reusebetogings ontketen, met boere wat supermarkte en verspreidingsentrums met trekkers versper en sakke kuilvoer aan die brand gesteek het. Daarna het mnr. Henk Staghouwer, Nederlandse minister van landbou, bedank. Hy het op Twitter gesê hy is nie die man vir die toepassing van die stikstofwetgewing nie.
Die jongste aankondiging het weer tot betogings gelei, met die polisie wat glo geweld gebruik het om boere van die strate te verwyder.