Dekgewas bekamp aalwurms
Die radys wat voor aartappels op McCain se Farm of the Future-plaas geplant word, is Terranova-bladramenas. Die saad word deur die Nederlandse onderneming Joordens verskaf en ingevoer deur Joined Specialised Farming (JSF) van Bapsfontein, wat hom op dekgewasse en herlewingslandbou toespits. Terranova word gebruik om parasitiese aalwurms te bekamp.
Bjorn Bischoff-Tulleken van JSF sê aalwurms kan tot 15 jaar dormant wees terwyl ander gewasse op ’n land is, maar wanneer aartappels geplant word, is dit of hulle as’t ware wakker skrik.
’n Aalwurm-siklus duur sowat 28 dae. “Dit is hoekom ons ’n drie maande lange groeitydperk aanbeveel, sodat die produsent deur drie aalwurm-siklusse kan gaan om die parasitiese aalwurms tot ’n bestuurbare vlak te verminder.
“’n Mens sal hulle nooit uit jou grond kry nie, maar dit gaan daaroor om hul getalle te onderdruk sodat geen ekonomiese skade aangerig kan word nie.” Bladramenas help ook om die getal voordelige aalwurms te vermeerder.
Terranova se penwortel groei 2 m diep of selfs dieper, en help om grondverdigting te verminder. Dit help om die stikstof van dieper vlakke af na die saadbedding te bring sodat dit vir die volgende kontantgewas beskikbaar is.
Wanneer dit sowat 10% van sy blomstadium bereik en isotiosianaat op sy hoogste vlak is, word dit in die grond teruggewerk. Isotiosianaat is ’n gas wat vrygestel word wanneer die plantmateriaal ingewerk word en vervul die funksie van ’n natuurlike beroking vir aalwurm.
Hollebrandse sê die hoofdoelwit met die plant van Terranova op die plaas is die voordele van aalwurmbekamping.
JSF verskaf Terranova al sedert 1995 aan plaaslike boere. Die gewas het eintlik besproeiing nodig, maar in KwaZulu-Natal is daar boere in taamlik hoëreënvalgebiede wat dit op droëland plant. Hollebrandse sê op droëland kan dit sonder besproeiing net in die reënseisoen groei, soos in die somer in Noordwes.
Bischoff-Tulleken sê vir boere wat deurdruk met Terranova, bring dit ’n verandering in denke mee. “Dit is nie ’n eenmalige chemiese behandeling nie. Dit duur minstens drie jaar om die volle voordele te verkry.
“Daarna sien ’n mens hoe alles in sinergie begin saamwerk. Omdat jou grond gesonder is, kan jy bestuurbare vlakke van parasitiese aalwurms bereik en die kanse is minder vir swamsiektes.
“Op lang termyn gaan jy minder kunsmis kan gebruik. Omdat die Terranova se wortelstelsel so diep en wyd groei, vang hy stikstof op wat uitgeloog het. Wanneer die bladramenas in die grond ingewerk is, is dit op ’n bruikbare vlak vir jou kontantgewas.
“Hoe gesonder jou grond word, hoe minder loging vind plaas. Uiteindelik is jou opbrengs en gehalte beter.”