Wat sê die beoordelaars?
Josef van Wyngaard, tegniese bestuurder by Voermol en sameroeper van die beoordelaarspaneel: “Ek het drie woorde: passievol, optimisties en produktief. Hierdie boere is almal optimisties oor die landbou en omring hulself nie met pessimistiese mense nie. Dit het vir my uitgestaan. Hul aanpasbaarheid is ook ’n groot faktor en waar daar kwessies in die boerdery voorkom, beraam hulle ’n plan. Hulle is veerkragtig en sal besluite neem en ’n produk verander om te verseker hul boerderye bly floreer.”
Dawie Maree, hoof van landbou-inligting en -bemarking by FNB: “Hulle is uitstekende boere wat die normale stand van sake uitdaag. Hulle hou ook deurentyd die vinger op die pols, weet wat in die bedryf en hul boerderye aangaan en pas deurentyd aan.”
Dr. Theuns Laas, onafhanklike skaapbeoordelaar: “Hierdie is ’n groep boere wat innoverend te werk gaan. Hulle hou die markte dop, ken hul vee en praktyke deur en deur, en pas aan wanneer toestande verander. Hulle weet ook hoe om die nodige inligting te verkry wanneer hulle nie weet nie, en kan die beste raad onderskei en dit toepas.” Kenneth Crampton, nasionale verkoopsbestuurder by Voermol: “Elkeen van hierdie boere is op die hoogte van hul bedryf en hulle produseer elkeen vir die mark en net waarna die mark op soek is. Tegnies is hulle ook baie sterk en goed ingelig – raad met voeding het hulle óf reeds toegepas, óf hulle is bewus daarvan. Terselfdertyd kyk elkeen ook na volhoubaarheid. Dit is duidelik dat boerdery vir hierdie boere ’n langtermyn- bedryf is en dat hulle daarin wil presteer.”
Martin Seyffert, onafhanklike beesbeoordelaar: “Uit ’n beesbeoordelaarsoogpunt het die bulle wat hierdie boere gebruik, my die meeste beïndruk. Die nuwe maniere waarop hulle veeboerdery benader, soos
Jason se integrasie van beeste, skape en hoenders, asook Hume se beesboerdery in oorwegend saaiwêreld, is eintlik ongelooflik. Hul entoesiasme is boonop aansteeklik en bereidwilligheid om te leer tekenend van boere wat die hoogste sport wil bereik.”