8 organiese beginsels

Organiese boerdery se onderbou is agt beginsels. JP Bence en Mariza van Wyk van Carpe Diem verduidelik:

1 Deur die handhawing en verbetering van die grondlewe word die natuurlike vrugbaarheid, stabiliteit en biodiversiteit verbeter, grondverdigting en erosie word voorkom en bekamp, en die plante word hoofsaaklik deur die grond se ekostelsel gevoed.

2 Mikrobes dra by tot die plant se funksionering in die natuurlike omgewing. Mikrobes en swamme is nodig om voedingstowwe aan die plant beskikbaar te stel en opname te verbeter, wat help om dit teen siektes te beskerm. Die grondlewe word verbeter deur ’n voordelige omgewing vir mikrobes en erdwurms te skep. Dit behels onder meer die grondstruktuur, mineralebalans en organiese materiaal. Mikrobiese kolonies groei danksy die afbreking van organiese materiaal naby die plant se wortels.

3 Organiese materiaal help om voedingstowwe te behou, grondstruktuur op te bou en grond se waterhouvermoë te verbeter. Die doeltreffendste manier is met dekgewasse. ’n Dekgewas is dus van deurslaggewende belang vir grondgesondheid en -struktuur.

4 Grondbewerking moet tot die minimum beperk word. Diep ploeg stel organiese materiaal bloot aan suurstof, wat tot ’n afname in mikrobiese afbreking van organiese materiaal lei.

5 Stikstofkunsmis en superfosfaat word nie toegelaat nie. Dit is gewoonlik die grootste kopskuif vir boere om van konvensionele na organiese produksie oor te slaan. Konvensionele boerdery maak op groot hoeveelhede sintetiese stikstofkunsmis staat wat met hoë fossielenergie-insette geproduseer word. Dit het ’n groot omgewingsimpak deur verliese aan stikstof na die atmosfeer en waterbronne. Daarteenoor is die beginsels van stikstofbestuur in ’n organiese boerdery die vermeerdering van biologiese stikstof vaslegging, die bewaring en vermeerdering v anorganiese materiaal as die hoofbron van stikstof, en die vermeerdering van die plant se interne stikstof sirkulasie en vermindering van stikstof verliese.

6 Peulplante kan as dekgewasse gesaai word, want dit is ’n belangrike bron van stikstof. Dit leef in simbiose met Rhizobium-bakterieë wat die vermoë het om stikstof uit die lug om te skakel na ammonium wat deur die plante gebruik word. In ideale toestande kan klawer en peulgewasse tot 200 kg stikstof per ha per jaar lewer.

7 Voorkomende maatreëls, soos geskikte spesies en kultivars wat teen plae en siektes bestand is, wisselbou, meganiese en fisieke verbouings metodes en die beskerming van natuurlike vyande kan tot gesonde plante bydra.

8 Die gebruik van nie-hernubare hulpbronne en eksterne insette moet beperk word. Streng reëls bepaal wat gebruik mag word. Alle insette, soos bemesting, grond gesondheid s middels en plaagdoders, moet ingevolge bepaalde organiese standaarde goedgekeur word.