Die ander KI vir jou plaas
Die veelbesproke ChatGPT het baie nut en aanwendings, maar jy hoef nog nie jou plaastasse te pak nie.
Kunsmatige intelligensie (KI) is niks nuuts nie omdat die meeste slimfone vandag met ’n stemgebaseerde assistent toegerus is. ChatGPT gebruik soortgelyke tegnologie, maar anders as jou foon, kan dit baie meer doen.
Worstel jy met enige van die volgende? Jy wil meer inligting oor ’n onderwerp hê, maar jy soek net ’n bondige antwoord, nie ’n klomp skakels waardeur jy self moet sif nie. Miskien wil jy ’n omskakeling doen tussen ponde per akker en kilogram per hektaar, of jy het hulp nodig met ’n Excel-formule of ’n ander rekenaarprobleem.
ChatGPT kan jou hiermee help – en doen dit só goed dat meer as 13 miljoen mense die platform daagliks gebruik.
Op die mees basiese vlak is die ChatGPT-model in twee stappe ontwikkel. Die eerste stap was om ’n groot hoeveelheid teksdata in ’n enkele datastel te konsolideer. Dit sluit bronne soos boeke, tydskrifte, webtuistes en artikels in. Na raming bevat die huidige weergawe (GPT-3) meer as 100 miljard woorde.
Die tweede stap is om die algoritme waarmee die model jou vrae beantwoord, met die data vanuit stap een te leer. Basies gebruik die model statistiek om die verwantskap tussen woorde en frases in die datastel te bepaal. In effek word die datastel in syfers en waarskynlikhede omgeskakel wat patrone beskryf.
Wanneer jy ’n vraag aan ChatGPT stel, ontleed dit die woorde en struktuur van jou sinne om statistiese patrone daarin te identifiseer. Dit gebruik dan hierdie patrone om te bepaal wat die waarskynlikste antwoord is deur ’n groot hoeveelheid data en verwerkte patrone te soek. Dus kan die algoritme nie soos ’n mens dink nie, maar gebruik dit statistiek om die betekenis van vrae te bepaal en die antwoord saam te stel.
Die grootste beperking op wat ChatGPT kan doen, spruit uit die data waarop dit geleer is en die model self. Die model is net so goed soos die data waarop dit opgelei is, dus kan dit nie al die inligting hê wat jy benodig nie, of dit kan antwoorde verskaf wat verouderd of onwaar is.
Die tegnologie agter ChatGPT is nie nuut nie, maar die manier waarop ChatGPT dit toepas, is uniek omdat dit menslike gesprekke naboots en jy opvolgvrae kan stel. Dit gaan die manier waarop ons die internet gebruik beduidend verander.
Mense is bang dat tegnologie hul werk gaan vervang, maar dit is meestal nie waar nie omdat ’n mens en ’n masjien saam meer gedoen kry.