Dink mooi oor krag
Of jy nou ’n energie-oplossing soek vir die hele wêreld, ’n land of jou boerdery, een ding word gou duidelik – daar is nie ’n enkele opwekkingstelsel wat aan ál die energievereistes gaan voldoen nie. Elektrisiteit is nie die enigste vorm van energie wat ingespan kan word nie. Die oplossing vir energieprobleme blyk ’n mengsel van energiebronne en opwekkingstelsels te wees.
Niemand sal stry dat beurtkrag ’n sinkgat vir die Suid-Afrikaanse ekonomie is nie, maar ’n mens moet oppas om nie die baba saam met die badwater weg te gooi nie, sê Harold Burgess, besturende direkteur van Dabar Energie.
Hy sê boere se ingesteldheid om probleme trompop te loop en op te los, maak partykeer dat hulle meer doen as wat nodig is om beurtkrag te oorbrug. “Daar word nog baie ure van bekostigbare elektrisiteit deur Eskom verskaf tussen beurtkrag deur en die probleem is om die beurtkragure te oorbrug eerder as om heeltemal sonder Eskom te probeer klaarkom.”
Hy sê ’n mens moet eerstens jou energieverbruikprofiel ontleed en seker maak jy mors niks en skuif wat jy kan na goedkoper verbruiksure toe. Dit kan ook beteken dat jy jou pakket moet verander, soos om oor te skakel na die Ruraflex-opsie. “Dink oor elektrisiteit soos jy oor presisieboerdery dink. Optimaliseer alles. Moenie paraffien of diesel brand om ’n stookketel warm te maak as daar beesmis op die grond lê wat verbrand kan word nie.”
Lourens du Plessis van die Louma-boerdery, wat met graangewasse, stoetbeeste en wild op 12 plase in vier provinsies boer, het heeltemal na sonkrag oorgeskakel. Sy stelsel kan meer as 7 MW opwek met ’n opbergingvermoë van 8 MW in batterye. Hy gebruik ’n wisselrigter van 5,5 MW en hy besproei 2 500 ha met dié stelsel.
Hy sê die intensiteit van die son het hulle geleer om ’n batterystelsel in te bring tesame met ’n bystandkragopwekker. Hul batterystelsel is nie van die duurste nie, aangesien dit net twee uur se vermoë het. Volgens hom is hul stelsel volhoubaar en bekostigbaar. “Kostegewys kan só ’n stelsel ’n besproeiingsboer met spilpunte R65 000/ha tot R70 000/ha kos. As jy dit verdiskonteer teen ’n maandelikse Eskomrekening, sal jy sien dit is absoluut volhoubaar en bekostigbaar.”