Belangrike neigings op wêreld se grootste landbouskou
Die lys vereistes waaraan boere moet voldoen, raak ál langer – van koolstofneutrale mikpunte tot volhoubare benutting van hulpbronne. Vyf neigings het op Agritechnica 2023 opgeval wat presisieboerdery nóg akkurater maak en outonomie ’n mededingende voordeel gee.
Lank was die hoofdoel van boere wêreldwyd om ’n vinnig groeiende bevolking van genoeg kos te voorsien. Deesdae is gehaltevereistes ’n paar trappies hoër, boonop teen ’n stewige prys, en onderhewig aan maatskaplik aanvaarbare en volhoubare omgewingspraktyke.
Volgens Hubertus Paetow, voorsitter van die Duitse landbouvereniging (DLG) wat Agritechnica, die wêreldbekende tweejaarlikse uitstalling vir landboumasjinerie en -werktuigtegnologie, aanbied, is die volhoubare en doeltreffende gebruik van hulpbronne ook ekonomies sinvol.
“Dit is terselfdertyd moontlik om produktiwiteit te verhoog en koste, asook die impak op die omgewing, te verminder.”
Agritechnica is die bymekaarkomplek van baanbrekers, visioenêres en kundiges van reg oor die wêreld om die nuutste tegnologie, oplossings en idees vir die landbou aan te bied, te siene te kry en te bespreek.
1 Slimmer gewasbeskerming
Harald Kramer van die Noordryn-Wesfaalse kamer van landbou (NRWCoA) se oesbeskermingsdiens sê gesprekke oor chemiese oesbeskermingsmetodes is dikwels hoogs emosioneel, met regerings en verbruikers wat toenemend daarteen gekant is, terwyl boere al hoe meer sukkel om hul doelwitte te bereik te midde van dié teenstand.
“Die gebruik van chemiese gewasbeskermingsmiddels moet verminder word, terwyl boere in dieselfde asem soortgelyke of beter opbrengste moet behaal. Aspekte soos meganiese skoffelwerk, balkspuit, kunsmatige intelligensie (KI) en ander tegnologieë word dus toenemend belangrik om dié doelwitte te bereik.”
Die meeste van hierdie tegnologieë maak dus reeds presiese gewasbeskermingsmetodes nog presieser.
Meer elektroniese hulpmiddels word deur die bank by alle gewasbespuitingstelsels ingespan om ’n spuit so doeltreffend moontlik te gebruik. Daaronder tel hommeltuie wat gebruik word om digitale toepassingskaarte akkuraat te skep. Dit bereken presies wat die bedreigings vir en behoeftes van ’n gewas is. Op sy beurt kan KI bereken watter gewasbeskermingsprodukte benodig word, in watter hoeveelhede en presies waar dit in ’n landery toegedien moet word. Die slimspuit wat met tegnologie soos veranderlike toediening en seksiebeheer geprogrammeer is, voer presies uit wat die digitale toedieningskaart bepaal.
KI, die boer en sy gewasbeskermingsraadgewer kan hierdie data verwerk om ingeligte projeksies en relevante bestuursbesluite te neem.
2 Eweredige bemesting
Alexander Czech van die NRWCoA sê verbeterde toedienings- en produkdoeltreffendheid, omgewingsbeskerming en hulpbrondoeltreffendheid bly baie belangrik in bemestingstegnologie.
Maatskappye soos Amazone het pro
dukte soos sy CurveControl-sagtewareprogram ontwikkel om kunsmis eweredig toe te dien wanneer die slimstrooier draai of om te voorkom dat kunsmis buite ’n landery se grens versprei word.
“CurveControl meet die draairadius, bereken die snelheid van uitstrooiing en pas die strooiskywe aan soos nodig. Potensieel verkeerde kunsmistoedienings word voorkom deur individuele kunsmisuitsetpunte aan te pas.”
Czech sê Rauch het BlockageDetect ontwikkel wat digitale kameras op die balke van lugdrukkunsmisstrooiers gebruik, tesame met KI, om outomaties op te let na enige blokkasies op die balk tydens toedieningswerk. Indien ’n verstopping bespeur word, word die menslike operateur onmiddellik in kennis gestel watter punte verstop is. Dit kan vinnig en maklik met die hand skoongemaak word.
Vloeibare organiese misstowwe, soos flodder van melkkoeie en varke, word toenemend gewild as bronne van “gratis” gewasvoeding.
Omdat die vlakke van belangrike voedingstowwe hierin dikwels wissel, was die probleem om akkuraat en deurlopend die toedieningshoeveelhede van dié voedingstowwe te bereik soos wat deur die gewasbestuurder verlang word.
Samson se OptiSensor Assist het nabyinfrarooispektroskopie ingespan by die maatskappy se universele strooiers. Dit is om eers die konsentrasies van organiese voedingstowwe in die vloeibare kunsmis te bepaal en dan voortdurend die toedieningshoeveelhede daarvan aan te pas om eweredige konsentrasies en verspreiding van dié voedingstowwe oor die landery te behaal.
3 Nóg stroperfunksies
Heelwat vordering word gemaak om die krag- en werkverrigting van stropers te optimaliseer, sê prof. Thomas Rademacher van die Bingen-universiteit van toegepaste wetenskappe in Duitsland.
Dit sluit groot herontwerpe en selfs verskuiwings van byvoorbeeld kragaftakkerstelsels vanaf die enjin en van ratkaste in; beter selfmonitering van belangrike onderdele wat kan slyt, soos laers, en selfs voorspellings oor hul oorblywende gebruiksduur; en outomatiese stelsels om ’n moderne stroper se uiteenlopende vermoëns ten volle te benut. Hierdie monitering gaan veel verder as wat die menslike operateur kan waarneem – vir maksimum kostedoeltreffendheid en minimum graanverliese.
Die jongste stropertegnologie sluit ook die bestuur van oesreste in. ’n Sleutelkwessie is om die egalige verspreiding van dié reste oor die grondoppervlak op syhellings en gedurende dwarswinde te handhaaf.
Stropervervaardigers soos New Holland en Nexat het stelsels ontwikkel of verbeter om te verseker dat oesreste deurlopend tot ’n verlangde lengte gekap word. ’n Resteverspreidingstelsel gebruik radar om die stroper se reste-uitlaat voortdurend aan te pas om eenvormige verspreiding van hierdie organiese materiaal agter die stroper te verseker en om presies die breedte van ’n pas geoeste strook te bedek.
4 Vordering met trekkers wat deur hernubare energie aangedryf word
Trekkerenjinvervaardigers lê toenemend klem op enjins wat aan wetgewing oor verminderde koolstofvrystellings voldoen, wat met alternatiewe, hernubare brandstof werk en wat stiller loop. Volgens dr. Roger Stirnimann, ’n dosent in landbou-ingenieurswese aan die skool vir landbou, bosbou en voedselwetenskap in Zollikofen in Switserland, gebeur dit sonder dat die enjin se werkverrigting ingeboet word.
Die Amerikaanse vervaardiger Cummins en FPT in Italië het reeds multibrandstofenjins ontwikkel wat op diesel, gehidrogeneerde plantaardige olie, metaan en waterstof kan loop. Ander vervaardigers volg al hoe meer hierdie neiging. Albei maatskappye se enjins word in werktuie van verskeie landbouhandelsmerke gebruik.
Hoewel dié enjins al hoe omgewingsvriendeliker is, bly die probleem om die tye tussen hervulling te verleng, aangesien sommige ▶
hernubare brandstof minder energiedig as konvensionele diesel is. Gelukkig ontwikkel vervaardigers maniere om terselfdertyd ’n trekker se houvermoë vir hernubare brandstof te verhoog en vir enjins om te kan vergoed vir dié brandstof se dikwels verminderde energiedigtheid.
Die kombinasie van batteryaangedrewe elektriese trekkers met waterstof-tot-elektrisiteit-brandstofselaandrywings hou belofte in vir die uitbreiding van die werkafstand van sulke trekkers. Fendt se Helios gebruik brandstofselaandrywing om die meeste van die trekkerenjin se basiskrag te verskaf. As die vraag na krag dié basiskrag oorskry, word elektrisiteit van bufferbatterye onmiddellik ingespan om in die bykomende vraag te voorsien.
5 Veilige outonomie
Tegnologie vir die outonome werksaamhede van trekker-werktuigkombinasies vorder met rasse skrede, sê Stirnimann. Terwyl ’n menslike operateur steeds in sommige gevalle vereis om so ’n kombinasie se bedrywighede te monitor, is ander daarop gerig om geen menslike ingryping hoegenaamd te vereis nie. Hy verwys na Krone en Lemken se voertuigvervoerstelsel wat ’n trekstang vir ’n konvensionele trekker gebruik om ’n volledig outonome trekker-werktuig-kombinasie van die plaaswerf na die werkplek te sleep. Dié outonome stelsel boots die spoed en rigtings van die konvensionele sleeptrekker ten nouste na, selfs teen ’n hoë spoed en om nou hoeke en deur hekke. Dit verseker dat ál die toerusting en die menslike operateur van die sleeptrekker veilig bly regdeur die verskuiwingsprosesse.
New Holland gebruik 360°- alsydige kamerastelsels wat op sy T4- batteryaangedrewe trekker gemonteer is. Nie net ry die trekker self tydens veldwerk nie, maar dit het ook ’n interessante “volg my”-modus vir menslike leiding tydens moeiliker veldwerk, soos wanneer groente geoes word.
“Die trekkeroperateur aktiveer die volg my-modus en gaan na die voorkant van die trekker waar die kameras dan die operateur identifiseer. Die trekker volg dan slegs dié persoon. Boonop is daar ’n gebarebeheerstelsel wat die trekker in staat stel om bestuursinstruksies deur handseine te ontvang,” sê Stirnimann.
Lloyd Phillips het Agritechnica 2023 as genooide gas van die DLG bygewoon.