Besproeiing is ’n hoeksteen van voedselsekerheid
Agbiz se landboubesigheidslede het ’n aansienlike belang by waterregte omdat hulle insette, toerusting en finansiering aan besproeiingsboerderye verskaf.
Die organisasie sê in sy kommentaar luidens ’n 2018-verslag van die Waternavorsingskommissie ondersteun besproeiing 25-30% van die nasionale landbouproduksie. Na raming sorg besproeiing vir tot 90% van die produksie van hoëwaardegewasse, soos aartappels, groente en vrugte, en 25-40% van die produksie van nywerheidsgewasse, soos suikerriet en katoen. Sowat 90% van vrugte en wyn word onder besproeiing verbou.
Luidens ’n 2015-verslag van die Wêreldnatuurlewefonds (WWF) word 1,5% van Suid-Afrika se grond vir besproeiingsboerdery gebruik, maar 30% van gewasse word hier geproduseer.
In die Nasionale Ontwikkelingsplan word ’n mikpunt gestel om die grond onder besproeiing met50%uittebrei.
Volgens Agbiz moet voorgestelde wysigings aan die Nasionale Waterwet getoets word teen die doelwitte in die meesterplan vir die landbou en voedselverwerking.
“Gegewe die werklikhede van ’n gebrek aan haalbare finansiering vir swart boere, ’n gebrek aan sekerheid van grondbesit, asook aan koördinering tussen die tersaaklike staatsdepartemente, dra die voorgestelde kriteria na ons mening by tot swart boere se stryd.” Dít moet aandag kry om die meesterplan te kan uitvoer.
“Vennootskappe tussen bestaande kommersiële produsente en nuwe swart toetreders kan bydra tot die verwesenliking van die doelwitte van die meesterplan, maar kommersiële produsente sal kommersiële finansiering nodig hê om die kollektiewe besproeiingspoor uit te brei of te vernuwe.”