Help ons kinders en raak gerus betrokke
Wêreldwye navorsing toon dat 90% van menslike breinontwikkeling plaasvind binne die eerste vyf jaar van 'n kind se lewe. Daar is vier basiese pilare wat nodig is vir gesonde breinontwikkeling: liefde, 'n gevoel van veiligheid, brein stimulasie en voeding.
In Mosselbaai kry ongeveer 1 900 van die 9 000 drie- tot vierjarige kinders 'n vorm van vroeë kinderontwikkeling. Die res bly agter. Die gevolg is swak skoolprestasie wat lei tot vroeë beëindiging van hul skoolloopbaan, en 'n groot vermorsing van kinders se potentiaal. Die verdere gevolg is 'n geslag wat geen of swak opleiding het, en hul dikwels wend tot misdaad om kos op die tafel te sit.
Ons kan dit verander. Baie kinders kan nie op skool vorder nie omdat hul voeding in die kritiese fase van hul breinontwikkeling onvoldoende was. Selfs hul fisiese groei word belemmer. Societas vir ECD in Mosselbaai, ‘n nie-winsgewende organisasie, is een van talle organisasie wat die uitdaging van vroeë kinderontwikkeling in die gebied aanspreek. Die statistieke wys egter dat ons almal saam nog nie eers 'n kwart van die kinders van ons munisipale gebied bereik nie. Daar is dus nog 'n reusetaak op hande. Societas for ECD Mosselbaai is gestig met die oog op vroeë kinderontwikkeling. Ons bedryf die Smartstartprogram. Smartstart beoog om 1 miljoen drieen vierjariges binne die volgende nege jaar bloot te stel aan vroeë kinderontwikkeling.
Societas Mosselbaai het hierdie jaar afgeskop met die opleiding van Smartstarters wat groepies twee maal per week vir drie ure aan 'n ontwikkelingprogram blootstel. Ons het tans 18 groepe, en vertrou dat ons teen die einde van die jaar minstens sal verdubbel in grootte, en daarna jaarliks sal verdubbel totdat soveel moontlik kinders in al ons gemeenskappe aan vroëe kinderontwikkeling blootgestel is.
Smartstart verskaf die opleiding en infrastruktuur gratis, ons bestuur bloot as organisasie hul program. Ons het 'n voltydse werker, Anne-marie Saffi, wat die Smartstarters begelei. Raak betrokke by Societas Mosselbaai. Kom skakel in by ons vrywilligergroep, of neem as vriendegroep of geloofsgroep verantwoordelikheid om een Smartstartgroep te borg deur spesiaal geformuleerde ontbytpap te verskaf aan die kinders.
Skakel Robert Knobel (044 691 2244 ) of epos robert.knobel@gmail.com of Lorinda Maritz (044 693 0097) of maritzl@mweb.co.za