Heidelberg promofeer na Premierliga vir 2018-seisoen

Die vreugdevure het Saterdagmiddag hoog gebrand in Heidelberg se rugbykamp nadat hulle vir George in die Presidentsliga-finaal op Outeniquapark met 28-20 geklop het.

Die wenspan het aanskoulike hardlooprugby gespeel en vier pragdrieë gedruk.

In die tweedeliga-finaal het Heidelberg ook vir George in 'n naelbytstryd met 18-17 getroef.

Heidelberg speel in 2018 dus in Premierliga nadat hy in 2008 laas daar deelgeneem het.

Die skeidsregter, Francois Davids het in die eerste helfte van die wedstryd vir Simon du Toit en die oud-Arend, Lyndon Hartnick (agtsteman), albei van Heidelberg, met geelkaarte van die veld gestuur. Die wenspan se 26-jarige spoedvraat, Gershom van Rooyen (regtervleuel), het die groot skare op hul voete gehad met sy spoed en voorgevoel vir die spel. Van Rooyen, wat twee pragdrieë gedruk het, is aangewys as speler van die wedstryd. Corbin Swartbooi (heelagter), Fernoldt Buis (linkervleuel), Jason Liebenberg (losskakel) en senterpaar Denver Lutz en Anrich Manho het ook uithalerspel gelewer vir die wenspan en getoon dat hulle hul man sal kan staan in die Premierliga. Voorlangs het hul flanke, Mark Meyer en Fernell Pretorius uithalerspel gelewer. Hul spoed na die afbreekpunte en rotsvaste verdediging het hul span op die wenpad geplaas. George se beste speler was ongetwyfeld hul kookwater-agtsteman, Logan Vorster. Vorster, wat sy span se eerste drie gedruk het, het 'n barshou gespeel in die vastelos. Hy is defnitief 'n talentvolle speler wat nog diep spore kan trap in SWD-rugby. Quinton Petzer (loskopstut) en Jacques Bothma (slot) het ook die oog gevang.

In die middelveld het hul senterpaar, Chris Kruger (kaptein) en Ashwin Heyns, baie goed saangespeel. Op die aanval en verdediging het hulle Heidelberg baie probleme besorg.

Uitslae en puntemakers:

Heidelberg I (28): Drieë - Gershom van Rooyen (regtervleuel, 2), Marcellino Manho (loskotstut), Mark Meyer (flank). Corbin Swartbooi (heelagter) slaag met twee doelskoppe en Jason Liebenberg (losskakel) klits ook twee doelskoppe oor.

George I (20): Drieë - Logan Vorster (agtsteman), Chris Kruger (binnesenter en kaptein), Syseko Miggels (plaasvervangervleuel). Meyer Janse van Rensburg (losskakel) slaag met ‘n strafdoel en Nathan Scott (heelagter) klits ‘n doelskop oor.

Heidelberg II (18): Drieë - Carlin Wewers, (agtsteman), Regan Geldenhuys (slot) Carlo Williams (regtervleuel) slaag met ‘n doelskop en twee strafdoele.

George II (17): Drieë - Quinton Mooiman (buitesenter), Niel Muller (slot). Ruan Lesch (losskakel) slaag met twee doelskoppe en ‘n strafdoel.