Munisipale hof ‘beskerm en bevorder waardes’
Die doel van Mosselbaai se munisipale hof is om ‘n veilige omgewing te skep deur wetsgehoorsaamheid te bevorder, aldus die munisipale woordvoerder, mnr Colin Puren.
Die munisipale hof, wat sedert 2012 in bedryf is het intussen uitgebrei tot die lewering van ’n volwaardige munisipale hof-funksie. Aanvanklik is slegs verkeersake hanteer. Nou word ook die oortredings van munisipale verordeninge en regulasies, soos dié wat betrekking het op ontbossing, bouregulasies, onwettige rommelstortings, besigheidslisensies en oorlaste, by dié hof hanteer.
Daar word kwartaalliks aan die munisipale raad oor die werksaamhede van die munisipale hof verslag gedoen. In die tweede kwartaal, vanaf April tot Junie vanjaar het 3 461 sake voor die hof gedien en is meer as 2 000 lasbriewe uitgereik, waarvan 25 bouregulasie-verwant was.
In dieselfde tydperk is inkomste van sowat R601 750 uit die hof gegenereer.
Volgens die munisipale bestuurder, adv Thys Giliomee, is die voordeel van ’n munisipale hof dat aandag gegee word aan sake wat nie noodwendig dieselfde prioriteit in landdroshowe sou geniet nie.
Die uitvoerende burgemeester van Mosselbaai, raadsheer Harry Levendal, sê die hof het reeds verskeie suksesse behaal en vervul die volle rol wat daarvoor voorsien is. Die hof se fokus is nie slegs op vervolging nie, maar ook om bewustheid te skep van verordening en regsprosesse, die munisipaliteit en gepaardgaande funksies. “Daardeur word die gemeenskap se waardes beskerm en bevorder.”
Sien ook op die brieweblad ‘n lesersbrief in hierdie verband.