Let op waterbeperkings
“Gebruik water omsigtig om te verhoed dat strenger maatreëls en selfs hoër tariewe moet volg,” maan die Mosselbaai-munisipaliteit.
Hoewel Mosselbaai tans nie dieselfde waternood as ander dele van die provinsie beleef nie, moet besef word dat die 10% vrywillige waterbeperking wat ingevolge Artikel 18 van die Waterdienste Verordening vanaf 1 September van krag is, vir alle gebruikers van drinkwater geld. Sou die Wolwedansdam se vlak tot onder 50% daal, sal strenger beperkings ingestel word.
Hierdie vrywillige besparingsmaatreëls op Mosselbaai volg nadat die Wes-Kaap, wat tans ‘n knellende droogte ervaar, tot droogterampgebied verklaar is. Hoewel Mosselbaai se beskikbare drinkwaterbronne nóg nie kritiek laag is nie, kan nie met water gemors word nie.
“Inwoners moet besef dat die waterontsoutingsaanleg baie duur water lewer. Daardie koste sal van die verbruiker verhaal moet word as die aanleg vir drinkwater ingespan moet word.”
Maatreëls
Indien die totale volume beskikbare water in die Wolwedans, Klipheuwel en Ernst Robertson damme tot onder 50% daal, sal strenger beperkings ingevolge die verordening geld, onder meer dat geen meganiese besproeiingstelsels mag gebruik mag word nie, behalwe die gebruik van mikro besproeiïngstelsels vir twee ure per dag, twee dae per week en slegs op Dinsdag en Vrydag oggende en slegs voor 09:00.
Die handnatlei van tuine met ‘n tuinslang sal slegs gedoen mag word vir een uur per dag tussen 18:00 – 19:00, twee dae per week.
Gelyke nommer huishoudings word tot Maandae en Donderdae beperk terwyl ongelyke nommer huishoudings slegs op Dinsdae en Vrydae hul tuine sal mag natlei. Let wel, die beperkings sal slegs geld mits die beskikbare water tot onder die 50% perk daal.
Sportvelde sal slegs vir twee ure per dag natgelei mag word en slegs op Dinsdag en Vrydagoggende voor 09:00.
Die afspuit van dakke en opritte sal nie toegelaat word nie en voertuie mag nie met ‘n tuinslang gewas word nie, tensy dit versterk word deur ‘n lae vloei, hoë druk afleweringstelsel.
Ingevolge die Waterdienste Verordening sal die toepaslike verhoogde watertariewe gehef word.
Minder as 40%
Sou die totale volume beskikbare water in volume daal tot minder as 40%, sal nóg strenger beperkings en besparings ingestel word.
Dan sal geen besproeiingstelsel gebruik mag word nie en tuine slegs vir een uur per dag, tussen 18:00 - 19:00, twee dae per week natgelei mag word.
Gelyke nommer huishoudings sal slegs Maandae en Dinsdae, en ongelyke nommer huishoudings slegs Dinsdae en Vrydae met ‘n tuinslang mag wat in die hand gehou word, natgelei word.
In dié geval mag sportvelde slegs natgespuit word vir twee ure per dag, op Dinsdag en Vrydagoggende voor 09:00. Geen skoonspuit van dakke en opritte en enige ander oppervlaktes en geen was van voertuie met ‘n tuinslang sal toegelaat word nie.
Ook sal die vul van swembaddens verbode wees. Akkommodasie-instellings en hotelle sal in hierdie geval by die munisipale bestuurder aansoek moet doen vir ‘n vergunning om hul swembaddens te vul.
Kommersiële ondernemings
Die waterbeperking hierbo sal nie van toepassing wees op enige bona fide en voltydse kommersiële ondernemings nie.
Die munisipaliteit sal wel areas met hoë waterdruk en ‘n hoë waterverbruik identifiseer vir die installasie van drukverlaging of ‘n vloeverminderingsapparaat.
Sou damvlakke onder 40% daal, sal selfs nog hoër watertariewe gehef word om die vermorsing van water te ontmoedig.
Minder as 30%
Sou die beskikbare watervlakke tot onder 30% daal, sal selfs nóg hoër watertariewe gehef word, en sal die gebruik van besproeiingstelsels verbied word. Geen gekoppelde tuinslange of outomatiese besproeiingstoerusting sal gebruik mag word nie.
Die natlei van tuine sal slegs deur ‘n emmer gedoen kan word. Geen strukture, dakke of opritte sal skoongespuit mag word nie en swembaddens sal nie opgevul mag word nie.
Die munisipaliteit sal waterverbruik heelwat strenger polisieër en ‘n klagtelyn en fluitblaserfasiliteit instel.
Konsultasie met grootmaatverbruikers in die nywerheids- en sakesektore, soos geïdentifiseer deur die rekening stelsel, sal geskied om verdere besparings teweeg te bring. Slegs die besproeiing van gholfsetperke, krieketkolfblaaie en rolbalbane sal toegelaat word. Geen ander tipe sportvelde sal natgelei mag word nie.
Vloeibeperkingsmeganismes sal geïnstalleer word by huishoudings wat meer as 20kl water per maand gebruik en die koste hiervan sal vir die verbruiker wees.
Minder as 20%
Indien die totale volume beskikbare water in volume daal tot minder as 20%, sal geen verbruikers meer op 6kl gratis water aanspraak kan maak nie en sal geen sportgronde natgelei mag word nie. ‘n Verdere verhoging in tariewe sal van krag word, en boetes sal uitgereik word vir oortreders van die waterbeperkingsmaatreëls. Die munisipale bestuurder, in konsultasie met die uitvoerende burgemeester, sal gemagtig word om die relevante beperkings te implementeer of te wysig en enige ander addisionele maatreëls te implementeer soos vereis afhangend van die omstandighede ter sprake.
‘n Waterbestuurtaakspan sal byeengeroep word om die munisipale bestuurder en uitvoerende burgemeester by te staan in die neem van besluite oor wateraanvraag en besparing gedurende die droogtetydperk.
Die direkteur: tegniese dienste sal maatreëls prioritiseer om waterlekkasies en geen-inkomste waterverbruik te verminder en sal maatreëls implementeer om grondwaterhulpbronne in landelike gebiede effektief te bestuur.
Anders as die res van die provinsie en selfs dorpe in die Suid-Kaap, is Mosselbaai tans nog in ‘n bevoorregte posisie om nie onmiddellike waterskaarste te ervaar nie.
Buurdorpe soos George Knysna en Riversdal en omgewing se inwoners gaan reeds onder streng waterbeperkings gebuk.
Gelyke nommer huishoudings word tot Maandae en Donderdae beperk terwyl ongelyke nommer huishoudings slegs op Dinsdae en Vrydae tuine mag natlei.