Brandwag se jeug baat by minister se besoek
Jeug in Brandwag het Woensdag besoek ontvang van die Wes-Kaapse LUR vir maatskaplike ontwikkeling, minister Albert Fritz, wat ‘n nuwe inisiatief na hierdie groepie inwoners uitgerol het.
“Vandag se jeug staar ander uitdagings in die gesig as toe ek ‘n jongmens was. Vandag se ouer garde kom uit ‘n rowwe tyd, maar vandag se jeug moet hul eie uitdagings, soos dat hulle soms minderwaardig voel, te bowe kom,” het minister Fritz gesê.
Fritz het gesê die jeug moet verantwoordelikheid vir hul eie toekoms neem en betrokke raak by inisiatiewe wat hulle kan help.
Hy het na die jeugkafee op Groot- Brakrivier verwys en die uitdaging gestel dat inisiatiewe geloods moet word om Brandwag se jeug by die suksesse wat daar bereik word, te betrek.
“Vandag se inisiatief gaan maniere bedink om Brandwag se jeugleiers in jeugontwikkelaars te verander. Die jongmense moet geleenthede aangryp, hulle moet hulself laat geld en met groter selfrespek optree. Jeug in plattelandse gemeenskappe is nie tweedeklasburgers nie, hulle moet met selftrots die uitdagings aangryp.”
In sy verwelkoming het Mosselbaai se uitvoerende burgemeester, wat lank op Brandwag skoolgehou het, gewys op twee Mosselbaairaadslede wat “hul verstand op Brandwag gekry het – en kyk watter sukses het hulle van hul lewens gemaak”. Beide raadslede Niklaas Booisen en Rosina Ruiters (onderburgemeester van die Edendistriksmunisipaliteit) het noue bande met Brandwag.
“Styg uit bo jou persoonlike omstandighede. As dit swaar gaan in jou ouerhuis, weet net jy sal eendag ‘n beter ouer moet wees. Ek self het in baie moeilike omstandighede grootgeword, maar dit het by my die wil wakker gemaak om te presteer. Maak vrede, moenie dat wraak jou verteer nie – sit jou wraakgedagtes in liefde om.”
Spesialisfasiliteerders het verskeie wegbreekgroepe met die jeug hanteer waar onder meer gefokus is op selfbeeld, selfgeldendheid en selfvertroue.
Foto’s: Nickey le Roux