Icosa reageer op klagtes
In ‘n persverklaring sê die Icosa-raadslid in die Mosselbaai munisipale raad, raadslid Dawid Kamfer die heksejag teen hom deur individuele DA-raadslede “het soos ‘n bom in hulle gesigte ontplof.”
Dit blyk die ondersoekbeampte het drie van die vier dissiplinêre klagtes teen raadslid Kamfer afgewys. Hy is wel skuldig bevind op ‘n vierde aanklag. “Die ondersoekbeampte het drie klagtes teen my as snert afgemaak en het geweier om my daarop te vervolg. Dié klagtes is uitgegooi. Die ondersoekbeampte het aan my gesê die klagtes teen my is so onbelangrik, hy kon dit nie eens as klagtes formuleer nie.”
Raadslid Kamfer beweer voorts in sy verklaring dat die klagtes teen hom gemotiveer is om sy “mond te snoer”. “Ek is altyd bereid om op te staan vir die mense wat ‘n onreg aangedoen word. Die raad het die ondersoeker se verslag aanvaar om drie van die vier klagtes teen my te laat vaar. Op een klagte, naamlik dat ek versuim het om ‘n verklaring van belange, ‘n administratiewe vorm binne ‘n gegewe tyd in te dien, het ek skuld erken,” sê raadslid Kamfer.