Hospitaal reik uit na kleingoed
Die Life Bay View-hospitaal het onlangs die Zisukhanyo-kleuterskool, waar 69 kinders tans versorg word, onder hul vlerk geneem. Die kleingoed ontvang daagliks drie etes deur die verloop van die dag, waaronder ‘n ontbyt, ‘n groter middagete en ‘n toebroodjie in die namiddag.
Personeel van die hospitaal het hul harte en beursies oopgemaak en ruim bygedra om beide kos en ander toebehore vir die kleuterskool te skenk en het boonop hul moue opgerol om te help om die fasiliteit ‘n nuwe aansig te gee.
“Ons Life Young Leaders het klimrame geverf, Deon, een van ons onderhoudspersoneel het vir toiletsitplekke vervang en daar is ruim bygedra tot die daaglikse behoefte aan voedsame eetgoed,” sê Elzaan Moelich, bemarkingsbestuurder van die hospitaal.
Die hospitaal se personeel het R9 500 vir die uitreik ingesamel en ‘n verdere
R16 000 is deur die Life Healthcare-groep bygedra. Hiermee is onder meer komberse, verf, eetgoed en kosvoorraad, sanitêre benodigdhede, koskaste, matrasse, tafeltjies en stoeltjies en selfs ‘n heerlike koek aangeskaf. Die hospitaal het boonop ‘n televisiestel aan die kleuterskool geskenk.
Daarbenewens het die hospitaal onderneem om maandeliks ‘n verdere bydrae tot die kleuterskool te maak.