Tientalle nuwe kunstenaars ondersteun Kansa-projek
Kansa sien vanjaar met groot opwinding uit na die jaarlikse Kansa Art From The Heart projek wat weer by die St Augustinekerk op George aangebied word. Die geleentheid vind plaas op Vrydag, 6 Oktober. Die publiek word genooi na die geselligheid en veiling om 19:00. Toegang is R50 per persoon.
Vanjaar het meer as 45 splinternuwe kunstenaars hul ondersteuning aan die projek gegee wat beteken dat Kansa vanjaar tussen 80 en 100 splinternuwe kunswerke beskikbaar gaan stel vir die veiling. Kansa beroep hul jaarliks op die ondersteuning van plaaslike kunstenaars vanaf Beaufort-Wes, die Klein Karoo- en Tuinroete-streek om deel te neem aan die projek. Kunstenaars word deur Kansa voorsien van ‘n skilderdoek en word dan die vryheid gebied om na willekeur te skilder.
Geld wat sodoende ingesamel word, word aangebied vir volhoubare dienslewering aan kankerpasiënte en hul gesinne in die Kansa Suid-Kaap / Karoo-streek.
Besoekers kan die werke wat opgeveil word enige tyd op 6 Oktober vanaf 09:00 tot 15:00 besigtig. Daarvolgens word oordeelkundig tyd gebied om ‘n aanbod op te maak. ‘n Dagbesoekersfooi van R10 per persoon word gedurende die dag gehef.
Kaartjies is op Beaufort-Wes beskikbaar by Amanda Koen, (071 635 4196) of stuur e-pos na akoen@cansa.org.za, Ania Lourens op Oudtshoorn (e-pos alourens@ cansa.org.za) en op George- en die Mosselbaai-area, kontak Lucinda Viljoen (082 663 3529) of e-pos lucinda@cansa. org.za