Hospitaal opgevrolik
In die vrouesaal het die personeel vrolik Brasilië se sokkerstatus en vrolike partytjie-atmosfeer gevier.
Personeel van die Mosselbaai Provinsiale Hospitaal het op 1 September die lente behoorlik loslittig stormgeloop toe elke afdeling se personeel volgens ‘n voorafbepaalde tema aangetrek en hul werksareas versier het. Selfs die pasiënte in die onderskeie sale het die aansteeklike atmosfeer nie vrygespring nie en oral was glimlaggies in die vrolike atmosfeer sigbaar toe die personeel deur die sale gestap, geskerts en gesels het.
Nie net het die afdelings teen mekaar meegeding om hul onderskeie tema die beste weer te gee nie, maar ‘n Meneer en Mejuffrou Lente is ook gekroon. Vanjaar het die nasionale organiseerders van Loslitdag deelnemers juis ‘n uitdaging gebied met die tema: “Kom ons vier ons diversiteit!” Loslitdag is ‘n projek gemik op die insluiting van en billikheid jeens persone met gestremdhede.
Loslitdag is ‘n jaarlikse instelling wat die personeel aangryp wanneer hulle vir een dag van die jaar en in ligter luim nie hul gewone uniforms hoef te dra nie. Boonop dien die dag nie net as herinnering dat die somer in aantog is nie, maar word ook aangewend om fondse in te samel.
Loslitdag 2017 sal nog lank onthou word vir die interessante, multi-kulturele uitbeelding van die onderskeie temas, waar selfs skape en hoenders ingespan is om die boodskap oor te dra.
Foto’s: Nickey le Roux