Da Gamaskop-hoof gee misdaadoorsig
Die stasiebevelvoerder van die Da Gamaskop-polisie, kol Mark Hartzenberg het sy dank teenoor die gemeenskap te kenne gegee vir hulle ondersteuning en samewerking teen misdaad.
Kolonel Hartzenberg het vanaf die OosKaap bevel opgeneem by die Da Gamaskoppolisiestasie einde 2016. "Glo my ek kom van die Oos-Kaap en in New Brighton weet jy wat is ernstige misdaad. Hier in Mosselbaai bly ons werklik in die mooiste deel van die land, indien nie die wêreld nie. Wat my bekommer is dat daar nog nie ‘n dringendheid is in ‘n kollektiewe poging van inwoners om misdaad daadwerklik aan te spreek nie. Ons wil u beskerm en dien maar sonder elkeen se bydae en ondersteuning is dit nie moontlik nie."
Kolonel Hartzenberg sê dat dit duidelik sigbaar is dat daar waar buurtwagte die aktiefste is, die minste misdaad en kriminele bedrywighede gerapporteer word. "Aan die ander kant kan ook gesien word dat wanneer buurtwagte gerus raak en minder aktief is, neem kriminele aktiwiteite dadelik toe. Oortreders soek slegs sagte teikens of geleenthede. Ons gesamentlike taak is om geleenthede te verminder en voornemende oortreders af te skrik."
Aangesien die gemeente en gemeenskap, die stasie so na aan die hart lê, aldus kol Hartzenberg, moet 'n veilige omgewing verseker word.
Misdaadtendense wat egter wel kommerwekkend in die stasie se bedieningsarea is:
Huisbrake en diefstal uit motorvoertuie in Uitbreiding 13 en 26
Inbrake by besighede in Voorbaai industriële gebied
Insidente van diefstal uit motorvoertuie, winkeldiefstal en bedrog by besigheidsentrums
Huisbrake in Hartenbos Heuwels veral Geelhoutlaan
Rooftogte in voetpaadjies en voetgangerroetes op Bill Jeffrey- en Ahof rylaan, asook Louis Fourieweg en die De Bakke-omgewing
Huisbrake in Bayview, Baydunes en Bob Bouersingel
Diefstalle en kriminele aktiwiteite in Brandwag/Ruiterbos en plaasomgewing
Vir enige inligting oor die buurtwagte en sektorbedrywighede, kontak: Sektor 1: Konstabel Ludumo Dyasi (082 778 7308)
Sektor 2: Adjudant-offisier Hein Meyer (079 894 1647)
Landelike beveiliging: Adjudant-offisier Pierre Botha (079 879 9093)
Da Gamaskop-polisiestasie: 044 606 2200/1/7