Ouma in aanhouding na kleinseun se steekdood

'n Bejaarde vrou van Brandwag is aangekla van moord nadat sy die afgelope naweek na bewering haar kleinseun met 'n gebreekte bottel noodlottig gewond het.

Volgens inligting verskaf deur die Da Gamaskop-polisie het die oorledene Andrian Muller (24) by sy grootouers in Mislandstraat gewoon. Hy het om 01:00 op Saterdag, 2 September na bewering die woning in Mislandstraat 122 betree en het glo sy grootouers met 'n besemstok en 'n gholfstok begin aanrand.

Die oorledene se ouma, Siena Muller (60), het vermoedelik uit noodweer 'n bottel gegryp en haar kleinseun met die gebreekte kant in die regterkant van sy nek gesteek. Hy het in Mislandstraat voor 'n ander woning ineengestort en is op die toneel dood verklaar.

Siena Muller is op die toneel in hegtenis geneem. "Die voorkoms van huishoudelike geweld wat tot noodlottige voorvalle lei, is vir ons kommerwekkend. Ons doen 'n beroep op die gemeenskap om hulle verskille op 'n konstruktiewe manier by te lê," sê kapt Wollie Fourie, die Da Gamaskop-polisie se kommunikasiebeampte.