Insiggewende praatjies by jaarvergadering
Die Belangegroep vir Aftree-oorde en Aanverwante Instansies in die SuidKaap (BAASK) hou vanjaar sy algemene jaarvergadering op Vrydag, 15 September, by die Kenani-dienssentrum in Mosselbaai.
BAASK wat in 2009 tot stand gekom het, is ‘n nie-winsgewende organisasie waarby aftreeoorde en enige ander instelling in die Suid-Kaap wat by bejaardesorg betrokke is, soos versorgingsoorde of ouetehuise, vrywillig kan aansluit.
Hierdie organisasie se hoofdoel is om die belange van die inwoners van sulke instellings te behartig en te beskerm. BAASK beywer hom in die besonder daarvoor om die lewensgehalte en welvaart van die inwoners sowel as die personeel daaraan verbonde te bevorder.
Sprekers
Tydens BAASK se algemene jaarvergadering vanjaar sal twee geleentheidsprekers optree. Danie Acker van die plaaslike prokureursfirma Rauch Gertenbach sal die afgevaardigdes toespreek oor die wetlike aspekte omtrent veroudering en fokus op die regsprobleme en regte van die bejaarde. Hannes Barnard van APROLASA (Arbeid Pro Labour SA Garden Route) sal op sy beurt inligting verskaf in verband met die minimumloon betaalbaar aan werknemers en wat vanaf Mei 2018 geïmplimenteer moet word.
Voor die totstandkoming van BAASK was daar feitlik geen kommunikasie tussen instansies gemoeid met bejaardesorg nie en is hulle in afsonderlike kompartemente bedryf. Tans is daar meer as twintig instellings gemoeid met bejaardesorg in die Suid-Kaap en hoofsaaklik geleë in Hartenbos, Mosselbaai, Stilbaai, George en Oudtshoorn wat geaffilieer is by BAASK. Die interaksie tussen die lede van BAASK het oor die afgelope aantal jare van groot waarde blyk te wees.
Die jaarlikse affiliasiefooi beloop slegs R250. Instansies wat daarin sou belangstel om by BAASK aan te sluit of as waarnemers die algemene jaarvergadering wil bywoon, kan in verbinding tree met Rolene van der Westhuizen van die Genevafontein-aftreeoord in George (044 871 2429 of per e-pos by rolene@grv.co.za) of Bets Wilkonson van die Caves-aftreeoord in Oudtshoorn (044 272 0883 of per e-pos by admin@thecaves.co.za).
BAASK beywer hom in die besonder daarvoor om die lewensgehalte en welvaart van die inwoners sowel as die personeel daaraan verbonde te bevorder.