‘Vaselinetjie’ op silwerdoek in George
Die film Vaselinetjie wat onlangs as die wenner van kykNET, Silwerskermfees aangewys is, word vanaf 22 September by Ster Kinekor, Garden Route Mall op George vertoon. Dié aangrypende rolprent speel in die Noord-Kaap en Johannesburg af en handel oor 'n wit meisie wat deur bruin mense grootgemaak is. Marguerite van Eeden, wat die volwasse Vaselinetjie speel, is as opkomende akteur vermeld tydens die feesafsluiting. Die regisseur, Corné van Rooyen, het amper 'n jaar lank die land met sy Bantam-bakkie plat gereis tussen klein dorpies se kinderhuise en wit plakkerskampe om die geliefde karakters in Anoeschka von Meck se boek te vind. Von Meck se boek is in 2004 deur Tafelberg gepubliseer is en het daarna 'n hele rits literêre toekennings ontvang. Die Engelse vertaling My Name is Vaselinetjie, is in 2008 deur Tafelberg gepubliseer.
Ware ervaringe
Die bekroonde boek Vaselinetjie is gegrond op Von Meck se ware ervarings as versorger in 'n kinderhuis en vertel die verhale van Helena “Vaselinetjie” Bosman en haar vriende, Killer, Pizzaface, Texan en Albie. Vaselinetjie as die naam van die hoofkarakter van hierdie eg menslike storie, bevat binnein haarself die volle spektrum van hoe die mens na hul ware identiteit soek, hoe die lewe hul verwond en in hierdie geval, hoe sy dit waarvan sy eens 'n slagoffer was, triomfantlik oorkom en as volwaardige persoon bo haar omstandighede uitstyg. Dit is nie net die verhaal van 'n Suid-Afrikaanse kinderhuiskind waarvan haar ras en herkoms twyfelagtig is nie. Dit is die verhaal van 'n nasie.
Aan die einde van die verhaal is Vaselinetjie nie meer "wit" of "bruin" of "baster" nie. Sy is haarself. Sy is tuis in haar eie vel, haar eie lewe, haar eie land.
Die bekroonde skryfster Anoeschka von Meck en voormalige joernalis van die Group Editors-koerante aan die Tuinroete, het in trane uitgebars toe Vaselinetjie aangewys is as die wenner van die kykNETSilwerskermfees.