Ondankbare werk na ure gedoen
Kort na 'n rioolstortingsvoorval by Blue Waters op Woensdag, 4 Oktober, het dieselfde rioollyn verlede Vrydag weer munisipale werkers tot laatnag laat swoeg om rommel, wat waarskynlik opsetlik in die rioollyn gestort is, te verwyder.
Die oorsaak van Vrydag se verstopping was 'n enorme klip van ongeveer 'n halfmeter in deursnee wat 'n kort distansie van die rioolput uitgehaal is. Dit wek die indruk dat die klip opsetlik by dié betrokke rioolput in die rioolpyplyn belang het.
Ondanks die ondankbare werk, het sowat 12 munisipale personeel gespook om rommel, wat onder meer klippe groter as bakstene, kombuisware, plastieksakke en heelwat ander materiaal uit die pyp te verwyder.
Ongeag die oortydwerk op 'n Vrydagaand en die onwelriekende aard daarvan, het die personeel die werk glimlaggend en in 'n goeie gees hanteer.
Toe die Mossel Bay Advertiser omstreeks 19:00 op die toneel kom, was Mosselbaai se munisipale bestuurder, adv Thys Giliomee, reeds geruime tyd op die toneel om sy personeel te ondersteun ondanks die feit dat hy met amptelike verlof was.
Roetine-ondersoek
Die verstopping is Vrydag tydens 'n roetineondersoek deur personeel opgemerk, wat onmiddellik stappe geneem het om dit op te klaar. 'n Kontrakteur het masjienerie beskikbaar gestel waarmee water onder hoë druk tussen twee rioolputte in die pypleiding gebruik is om die verstopping te ontsetel. Personeel moes fisies met grawe die vullis uitgrawe en emmervragte vol daarvan uit die pyp verwyder. 'n Brandweerwa is ingespan om die nodige water vir die hoëdrukspuit te voorsien.
By die een rioolput was hope rioolslyk en gemors opmerklik wat vroeër weens die verstopping uit die rioolput oorstroom het. Hiervan, asook van die onverwerkte rioolwater het in 'n stormwatersloot, wat in die see uitmond, beland. Die munisipaliteit het onmiddellik met kalk en bio-afbreekbare ontsmetmiddels die watersloot en strand voorkomend behandel en het Saterdag, 7 Oktober verdere afvloei gemonitor en behandel.
Veral problematies was gebruikte outipe skeermeslemmetjies wat in die vullis opgemerk is en wat die skoonmaakwerk vir die personeel lewensgevaalik maak.
Beroep op gemeenskap
"Dis kommerwekkend dat die rioollyn, wat riool vanaf Mosselbaai-dorp, JCC, asook Uitbreidings 26 en 8 na pompstasies stroomaf gelei so gereeld verstop. 'n Beroep word op die gemeenskap gedoen om toe te sien dat vaste afval soos klippe, plastiek, lap en ander rommel nie in die rioolpypleiding beland nie," maan adv Giliomee.
Vrydag se voorval volg op 'n verstopping om omstreeks 09:30 op Woensdagoggend, 4 Oktober toe die munisipaliteit by dieselfde area ook 'n verstopping in die pypleiding moes verwyder en die area moes ontsmet. Vantevore het dele van 'n garingboom in dieselfde omgewing die rioolpyplyn verstop. Boonop veroorsaak allerlei rommel, onder meer winkeltrollies en motorbuitebande dat die oop stormwatersloot daar naby ook gereeld skoongemaak moet word om verstoppings te voorkom.
Foto's: Nickey le Roux