Vernuwing by Pavilion
Die gewilde Santos Pavilion, eens 'n juweel in Mosselbaai se kroon, sal binnekort sy afgeleefde voorkoms afskud wanneer opknapwerk, wat tans binne en buite gedoen word, waarskynlik voor die einde van November voltooi word.
Die pragtige ou klipgebou is op 24 April 1979 deur 'n brand in puin gelê, en hoewel dit pas voor daardie tyd as nasionale gedenkwaardigheid verklaar is, was daar by tye sterk aandrang ook van die munisipaliteit van daardie jare om die bouval liefs te sloop.
Die Santos Pavilion is egter een van slegs twee van sy soort, en die enigste in die suidelike halfrond, wat só idillies op die strand gebou is. Met huidige omgewingswetgewing is hierdie gebou juis vanweë sy ligging onvervangbaar.
Dit is destyds in 1915 ontwerp deur H Davidge-Pitts en deur 'n Mosselbaaier, WJ Swart uit plaaslike klip gebou. Ná die brand is die planne vir die restourasie van die gebou geskoei op die oorspronklike planne wat by die Dias Museum bewaar is, maar was dit steeds aan goedkeuring deur die befaamde argitekte Gawie Fagan en Revel Fox, onderhewig.
Die Santos Pavilion is een van twee van sy soort, en die enigste in die suidelike halfrond, wat só idillies op die strand gebou is.
Oud word vernuwe
Tog het sekere elemente, soos die horlosie in die kloktoring nie in die nuwe gedaante herleef nie, en is slegs die buitekant na die oorspronklike herstel, terwyl die binnekant vir praktiese gebruik verander is. Ses woonstelle is ook ingerig en in 1987 is 'n besondere ruim huurkontrak aangegaan met die ontwikkelaars wat vir die destydse restourasie verantwoordelik was.
Deel van dié huurkontrak bepaal dat die huurders die gebou sal onderhou. Om die huurders en veral die restaurant tegemoet te kom, het die munisipaliteit opknappings aan die parkeerarea by die Pavilion gedoen en is onder meer beligting aangebring ter wille van veilige parkering. Verdere verbeteringe aan die parkeerruimte mag volg sodra fondse daarvoor bewillig kan word.
Binne die area wat as restaurant bedryf is, lyk dinge egter heelwat anders. Onder Ansie Steyn van Ansie Steyn Interiors (ASI) se bedrewe hand is die dubbele lae skynplafon verwyder en is die pragtige hout van die koepeldak ontbloot. Met versteekte beligting wat strategies geplaas is, word die warm karakter van die hout belig.
Die bouer wat by die opknappingswerk betrokke is, Quintus Deacon, sê toentertyd se vakmanskap is duidelik sigbaar in die unieke voë van die dakkappe. "Vandag werk vakmanne nie meer só noukeurig nie, dis baie spesiaal."
Ander tydelike mure is verwyder en pragtige, groot vensters is ontbloot wat toelaat dat die see vanuit bykans elke hoekie van die vertrek sigbaar is.
Die houtvensterrame, steeds in 'n goeie toestand, word tot hul oorspronklike grein gerestoureer.
"Binne maak ek van wit aksente gebruik, terwyl die aksente buite daarenteen alles swart is," sê Ansie opgewonde toe sy die munisipale afvaardiging onlangs deur die opknappingsprojek begelei.
Munisipaliteit ondersteun
Anders as in Julie 1980, toe die destydse stadstesourier in 'n raadsvergadering volgens berigte sou gesê het: "... if thePavilion is restored, it will make no contribution to revenue and have limited appeal to the public," stel die huidige munisipale bestuur beslis belang in die opknappingswerk.
"Ons is opgewonde oor wat hier in die vooruitsig gestel word. Dit sal weer toeriste en plaaslike inwoners na Santosstrand lok, beslis die plaaslike ekonomie stimuleer," meen die uitvoerende onderburgemeester, raadslid Dirk Kotzé.
Die munisipale bestuurder, adv Thys Giliomee, het sy tevredenheid met die vordering van die opknappings uitgespreek en gesê die ou gebou herleef tot so na as moontlik aan sy oorspronklike glorie. Hy was veral tevrede met die wyse waarop die ou vensters ontbloot en as aksente gebruik word in die nuwe gedaante wat die ou gebou nou aanneem.
Na afloop van die opknapping sal die area steeds as 'n byderwetse restaurant, gepas voorts die Jackall on the Beach genoem, bedryf word.
"Die betrokkenheid vorentoe van Jantjie Jonker van Jakkalsvlei by die restaurant word gepas vergestalt in die nuwe naam," meen Marius Schoeman, die huidige restauranteienaar.