Bejaarde voetganger se dood skok dorp
Die ongeluk wat Maandagmiddag, 6 November kort na 14:00 'n 88-jarige man se lewe geëis het toe hy deur 'n vragmotor getref is by die kruising van Louis Fourieweg en Kaap de Goede Hooplaan, het Mosselbaaiers diep getref. Sedert sy afsterwe, dui die geskokte gemeenskap se reaksie daarop dat oom Jan Heinrich Swart, of oom John soos hy bekend was, baie geliefd was.
Volgens inligting, was oom John oor die kruising op pad vanaf die Aura Aesta- woonkompleks in die rigting van Hartenbos toe 'n watertrok van Transand hom getref het. Hy is op die toneel dood verklaar. Verskeie ooggetuies het die ongeluk sien gebeur.
Die verkeerslig by die kruising was groen vir die aankomende verkeer, toe oom John skynbaar net voor die aankomende vragmotor inbeweeg het.
Adrie Kruger, menslike hulpbronbestuurder van Transand het by navraag aan die Mossel Bay Advertiser gesê dat hulle innig jammer is oor oom John, se afsterwe.
“Die voetganger het teen die vragmotor vasgeloop, terwyl die vragmotor besig was om die kruising oor te steek. Die vragmotorbestuurder het geswenk om die voetganger te probeer vermy, maar die hy het teen die modderskerm van die vragmotor vasgeloop. Dit het die voetganger teruggeslinger. Vragmotorbestuurder kry berading vir skok na die ongeluk.”
'n Saak van strafbare manslag word deur die ao A Stokes van die Da Gamaskoppolisie ondersoek.
Baie aktief
Oom John se dood het groot emosie onder parkrunners uitgelok, aangesien hy op 88 die oudste parkrunner was. Werner MorkelBrink, 'n koördineerder van die Hartenbos-
parkrun het gesê dat oom John van die begin van die parkrun af, baie betrokke was. "Ons kom 'n lang pad saam. Hy het saam met ons die roete help beplan omdat ons dit toeganklik en gemaklik vir almal wou maak."
Nog 'n vrywilliger by die parkrun, Ita van Rensburg sê sy het altyd 'n ogie oor hom gehou dat hy dit nie oordoen nie. "Hy het altyd as ek hom vermaan het gesê 'maar ek is 'n haastige mens meisiekind'."
Parkrunners het op die Hartenbosparkrun se facebookblad omtrent hulle harte uitgestort oor oom John se dood. Sommige het na hom as
'n "pa" en "oupa" verwys, ander het hom weer 'n legende, 'n ikoon en inspirasie vir ander drawwers genoem.
Altyd behulpsaam
Oom John was die afgelope ses jaar en een maand' n inwoner van die Hartenbosversorgingsoord .Die bestuurder, Johan Jacobs sê dat hulle sedert Maandagmiddag na die ongeluk oorval is met oproepe aangaande oom John se afsterwe. "'n Mens kan net nie glo hoe bekend hy was nie," het Jacobs vandeesweek aan die Advertiser gesê. Jacobs het genoem dat oom John besonder behulpsaam was en dat hy steeds betrokke was by jukskei en nog Bybellesse ook gegee het by Laerskool Hartenbos.
‘Verskriklik lief vir stap’
Koot Swart (84), oom John se jonger broer wat in Aura Aesta woon sê hy het so baie mense geken omdat hy so baie van stap gehou het. "Oral waar hy gestap het, het hy die een en daai een ontmoet en met hulle gesels." Die broers het grootgeword in die Williston-distrik en later beide eiendom in Aura Aesta, Hartenbos gekoop. Oom John het egter na sy vrou se afsterwe in die Hartenbos-versorgingsoord gaan woon. "Hy het gesê die alleenheid vang hom." Self 'n behendige jukskeispeler wat die afgelope Saterdag nog ses wedstryde kafgedraf het, sê Koot dat sy broer verlede Donderdag nog so 'n uurtjie kom saam jukskei speel het op die Hartenbosbane. Hy was ook 'n aktiewe lid van die Mosselbaai-
houtwerkersgilde. Koot sê die laaste oproep op sy broer se foon was na sy enigste dogter, wat in die Paarl woon. Hy sê hy het met 'n vrou gepraat wat 'n ooggetuie was en sy het gesien hoe oom John net aanhou loop voor die vragmotor in. Hy was vinnig op die toneel na die ongeluk. "Ek het sy bril en horlosie daar opgetel, fyn en flenters."
Die gedenkdiens vir oom John Swart word gehou op Maandag, 13 November om 11:00 in die Hartenbos NG-gemeente.
* Sedert die voorval het verskeie lede van die publiek gesê dat die verkeerslig by die kruising nie genoeg tyd gee vir voetgangers om die pad te kruis nie. Die kruising word glo ook deur kinders van Sonskynvallei gebruik wat by Laerskool Hartenbos skoolgaan. 'n Navraag is gerig aan die provinsiale verkeer s departement wat dit verwys het na die Mosselbaai-munisipaliteit vir kommentaar. Teen druktyd was kommentaar nog nie beskikbaar gewees nie.
* Lees ook die huldeblyke aan oom John Swart op die brieweblad.