Ontbossing net die begin
Nie net gaan die ontbossing van 'n groot strook van die skouer van Louis Fourieweg help om die area vir voetgangers te beveilig nie, die droom is om uiteindelik hierlangs en deur Heiderand en Da Nova 'n veilige area te skep waar die gemeenskap kan oefen en uiteindelik gesonder kan lewe.
Dit is waarna wyksraadslid Mark Furness mik toe hy bykans R40 000 uit sy eie sak bestee het om in samewerking met die plaaslike buurtwag skouer aan die wiel te sit om die area te beveilig.
"Louis Fourieweg is 'n provinsiale pad, gevolglik kon die munisipaliteit nie die ontbossing doen nie. Gemeenskap s veiligheid en die bevordering van 'n omgewing waarin 'n gesonde leefstyl aangemoedig kan word, is só belangrik dat ek bereid was om die projek self te befonds," sê raadslid Furness. Hy meld dat veral voetgangers dikwels die teiken van misdadigers geword het wanneer hulle langs Louis Fourieweg stap en dat mense selfs daarlangs met messe aangeval is. Die digte bosse het as skuilplek vir die misdadigers gedien. Die ontbossing het reeds tot beter beveiliging bygedra omdat misdadigers nie meer van die verrassingselement kan gebruik maak wanneer hulle voetgangers aanval nie.
Gesonde leefstyl
Met Mosselbaai wat reeds die gewilde, jaarlikse Sportfees en boonop die Arthur Johnson Sportweek by Hoërskool Punt aanbied, spreek dit vanself dat die dorp met die nodige aansporing in die sportmekka van die Suid-Kaap kan ontwikkel.
Die projek, wat oor 'n aantal jaar sal moet strek, beoog om uiteindelik die strook wat nou ontbos is, met gras en inheemse bome te beplant waarlangs 'n veilige roete aangelê kan word vir jongmense en die jonges van gees om buitenshuis te kan oefen.
Sodra fondse beskikbaar word, beoog raadslid Furness om buitelug gimnasium toerusting op strategiese plekke te installeer om 'n verdere insentief vir goeie oefening te wees.
"Hierdie tipe toerusting word vir jare reeds op Seepunt se promenade, by Muizenberg en op ander strategiese punte in Kaapstad deur duisende mense gebruik en is reeds as peuterbestand bewys. Die apparaat bied 'n sterk aansporing vir mense wat nie 'n gimnasium kan bekostig nie om werklik aktief te raak en te oefen.
"Ek bedank opreg diegene wat met die projek tot nog toe ruim tyd, toerusting en fondse geborg net, onder meer MassHire en Meyer Transport. Nou is daar vir die volgende fase egter skenkings en borgskappe nodig vir die bome en onder meer gras. Ek doen 'n beroep op die gemeenskap om, waar moontlik, behulpsaam te wees. Enige tuindienste ondernemings of ander besighede wat graag betrokke wil raak, kan my gerus kontak (044 606 5000)," nooi raadslid Furness.