‘Grootste swartpot’ arriveer vir fees
Vir meer oor die gassjef, Karen du Plessis, besoek by www.kitchenqueen. co.za en haar facebook-bladsy: Kitchen Queen Food Studio
Alles wat die sintuie kan prikkel, en hope daarvan! Dít is wat vir die komende Soul Festival in die vooruitsig gestel word.
Die reëlingskomitee het vandeesweek met groot opgewondenheid verneem dat die grootste swartpot ter wêreld vir hierdie fees reeds in Mosselbaai aangekom het en 'n fokuspunt van die fees gaan wees.
"Die pot weeg meer as 2.5 ton, met 'n deursnee van twee meter. Dit was
'n enorme taak om dit tot hier vervoer te kry. Nou word dit vir eers veilig geberg en sorgvuldig voorberei vir die Soul Festival," sê Marika Thomatos, eienaar en een van die grootste dryfvere van die fees.
Borge
Die groot pot gaan gebruik word om kos by die feesarena voor te berei, en borge wat sou belangstel om deel van hierdie projek te wees, is welkom om Marika direk by marika@munromanor.com te kontak.
Hoewel die feesarena by die ou kragstasie op Santosstrand gesetel gaan wees, sal talle restaurante in en om Mosselbaai net die beste wat hulle kan aanbied, voorsit. Restaurante wat graag deel van die fees wil wees, kan hul besonderhede aan Rozain Hansen by rhansen@mosselbay.gov.za deurgee. Die sperdatum is 25 April.
Gratis
Planne vorder fluks om die Diaz Express in te span vir die twee feesdae om feesgangers gratis tussen Mosselbaai en Groot-Brakrivier te vervoer, met stopplekke tussenin waar feesgangers kan kus en keur aan voorkeurkos en vermaak.
Die enorme swartpot vorm egter die sentrale fokuspunt van die fees met onder meer die Pot-aan-die-kookkonsert wat talle plaaslike en groot name in die musiekbedryf gaan betrek. Hierbenewens sal interessante kospraatjies deur onder meer Ina Paarman en andere verseker die fynproewerkokke se belangstelling wek, terwyl 'n filmfees wag op diegene wat genoeg te ete en drinke gehad het.
By die feesarena sal die geurigste, lekkerste koffie, koudste en voortreflikste wyne en boetiekbier die smaaklikste eetgoed goed komplimenteer.
Boonop, anders as in die res van die land, is toegang tot die Soul Festival gratis. Dagboek dus nou reeds 13 tot 15 Julie, nooi vriende en familie - oudergewoonte gaan hierdie 'n fees der feeste wees.