Polisie red mishandelde kinders Hy het geweldig pyn ervaar en sy been was erg geswel.
Twee seuns is die afgelope week in afsonderlike voorvalle uit hul ouers se sorg verwyder nadat die gemeenskap die polisie daarvan vertel het dat die kinders mishandel word. Op Maandag, 16 April om 14:00 is polisiebeamptes van die Mosselbaai se eenheid vir gesinsgeweld, kinderbeskerming en seksuele misdrywe na 'n woning in Ezindlovini, Aslapark nadat hulle gerugte gehoor het dat
'n agtjarige seun reeds sedert Donderdag,
12 April in 'n huis toegesluit word.
Met die polisie se aankoms was die voordeur van die huis aan die buitekant met 'n skuifslot gesluit. Adjudant-offisier Alistair Rezant het die deur oopgemaak en die slagoffer, wat ernstig aangerand is, alleen in die huis aangetref. Volgens 'n polisiewoordvoerder is die slagoffer na bewering deur sy 25-jarige ma reeds die Donderdag vermoedelik met 'n plank aangerand en met 'n klip teen die knie gegooi. Die seun, 'n leerder by Garden Route Primêr, het nog sy skoolklere aangehad toe die polisie hom gekry het. Hy het eenkant in die huis gesit.
"Dit blyk dat die kind met die polisie se aankoms reeds vier dae in die huis toegesluit was. Hy het geweldig pyn ervaar en sy been was erg geswel. Hy het ook gesukkel om te loop."
Polisiebeamptes het vir die kind kos gegee alhoewel dit nie bevestig kon word of die kind sonder kos en water in die huis toegesluit is nie.
Die slagoffer is onmiddelik uit sy ma se sorg verwyder en na die Mosselbaai
provinsiale hospitaal geneem waarna hy na die George-hospitaal oorgeplaas is.
Dokters het teen Dinsdag aan sy been geopereer omdat die wond na bewering reeds septies was en die seun nie gou genoeg mediese behandeling ontvang het nie.
Die kind sal vermoedelik vandag, Vrydag 20 April ontslaan word waarna hy in 'n plek van veiligheid geplaas sal word.
Polisie het die ma dieselfde dag opgespoor waar sy twee huise verder saam met haar babadogtertjie by 'n buurvrou gekuier het.
Die ma is aangekla van aanranding met die doel om ernstig te beseer.
Die seun se pa woon in die Oos-Kaap en die omstandighede van sy baba-halfsussie sal ondersoek word.
Pa rand kind aan oor suiker
Op Dinsdag, 17
April is Groot Brakpolisie na 'n woning in Wolwedans ontbied nadat die gemeenskap daar gedreig het om reg in eie hande te neem oor 'n pa (40) wat na bewering gereeld sy 11-jarige seun aanrand. Konstabel Laurianne Botha het op die klagte gereageer en met haar aankoms by die woning het sy gehoor hoe 'n kind onophoudelik skree en huil.
Botha het bystand ontbied waarna die polisie die 11-jarige seun gekry het waar hy vreesbevange in 'n buitetoilet vir sy pa weggekruip het.
Die seun het aan polisiebeamptes vertel dat sy pa hom vroeër gestuur het om 'n 2,5kg sak suiker te koop waarna die sak by 'n draad waardeur die kind geklim het, geskeur het.
'n Bietjie van die suiker het glo uitgeval. Volgens die polisiewoordvoerder, sers Chantel Marais het die pa die seun met sy tuiskoms na bewering met die sak suiker deur die gesig geslaan, hom verder in sy gesig met 'n onbekende voorwerp aangerand en hom ook onder meer met die agterkant van 'n lyfgordel oor die lyf geslaan.
'n Betroubare bron na aan die ondersoek sê die kind het homself natgemaak weens die aanranding.
"Die slagoffer is baie bang vir sy pa en het aan die polisie gesê dat sy pa hom sal
doodmaak. Lede van die gemeenskap het gedreig om reg in eie hande te neem omdat die pa volgens hulle gereeld sy seun wreed aanrand. Daar is inwoners wat bang is die pa slaan die seun nog dood."
Die slagoffer het voorheen by sy ma op De Rust gewoon maar het vir die Desembervakansie vir sy pa kom kuier. Volgens sers Marais het die pa vir die kind gesê dat hy hom by Laerskool Vorentoe sou inskryf, maar dit het nooit gebeur nie.
Daar woon nie ander kinders in die huis nie. Die seun is intussen met sy ma op De Rust herenig. Volgens sers Marais was die ma oorstelp van vreugde om haar kind te sien.
Die verdagte is in hegtenis geneem en staar 'n klag van aanranding met die doel om ernstig te beseer in die gesig.