Tarka-dwelmnes nou skoon
Hoewel dit waarskynlik soos ‘n nimmereindigende proses gevoel het, is die inwoners van Tarka eindelik van die dwelmnes in Bokmakieriestraat
118 ontslae. Daar is op grond van ‘n hooggeregshofbevel beslag op die huis gelê waarna dit deur die staat verkoop is en die dwelmsmous, Louis Company, wat die gemeenskap se lewens vergal het, dien tans tronkstraf uit.
Opgesom, klink dit na ‘n redelik eenvoudige proses, terwyl dit allermins die geval is. Die Mossel Bay Advertiser het in Januarie 2016 reeds berig, oor hoe die gemeenskap van Tarka na die huis opgeruk en die vensters en deure met planke toegespyker het.
Gedurende hierdie tydperk is ‘n petisie ook aan die bevelvoerder van die Mosselbaai-polsiestasie, lt kol Albert Haggard oorhandig. Ten tye van die voorval was daar 87 hofsake, wat betrekking het op dwelmverkope vanuit dié huis, hangende in die hof, het die
Advertiser destyds berig. Die veroordeelde dwelmsmous, Louis Company was gedurende hierdie tydperk in aanhouding, maar desnieteenstaande is daar steeds uit die huis met dwelms handelgedryf.
‘n Ondersoekbeampte in die saak, sers Heinrich Hansen van die Mosselbaaipolisiestasie is reeds etlike jare met ondersoekwerk in die saak besig. Hy het ten einde raad, by die Nasionale Vervolgingsgesag aangeklop.
Nasionale Vervolgingsgesag
Ricardo Rhoda van die Nasionale Vervolgingsgesag se batebeslagleggingseenheid in Kaapstad is sedert Januarie 2014 by die saak betrokke.
Meneer Rhoda het vandeesweek by navraag verduidelik dat hooggeregshofaansoeke nie net lank neem om afgehandel te word nie, maar ook baie duur is vanweë die hoeveelheid manure betrokke. Die veelvoud optredes gehou deur die polisie, die sake aanhangig gemaak teen Company, die petisies opgetrek vanuit die gemeenskap moes dus bydra tot die bewyslas dat Bokmakieriestraat 118, ten spyte daarvan dat die aangeklaagde dwelmsmous in aanhouding was, as ‘n instrument om ‘n misdryf te pleeg beskou kon word, het mnr Rhoda verduidelik.
“Daar moes dus bewys kon word dat die perseel meer as net ‘n irritasie of stoornis vir die gemeenskap is. Die enigste oorblywende manier om die gemeenskap te help, sou die verkryging van ‘n verbeurverklaringsbevel behels.”
Die eiendom is nie van veel waarde nie, dus was dit geen maklike taak nie omdat die verkoop daarvan nie sou opweeg teen die regskoste betrokke by die proses nie.
Aangesien dit egter duidelik was uit die bewyslas, dat die gemeenskap van Tarka ernstig gebuk gegaan het onder die dwelmeuwel in hulle midde vanweë die bedrywighede by Bokmakieriestraat 118, aldus mnr Rhoda, is die nodige prosesse wel in plek gesit en beslissings dienooreenkomstig voltrek.
“Ons wou ‘n baie sterk boodskap uitstuur met hierdie beslissing.” Mnr Rhoda het ook bevestig dat die beslissing aangaande Bokmakieriestraat 118 juis besonders is, aangesien dit ‘n eerste in die Suid-Kaap is.
Sersant Heinrich Hansen is ondersteun deur ao Deon Louw in die suksesvolle afhandeling van die saak.