Kind veilig in ma se sorg
‘n Dertienjarige seun van Riversdal wat na bewering sonder sy familie se medewete na Groot-Brakrivier geryloop het, is die afgelope naweek veilig terug aan sy ma besorg.
Volgens die woordvoerder van die polisiestasie op Groot-Brakrivier, sers Chantel Marais het die kind Saterdag by inwoners van Groot Brak aangeklop.
“Die kind beweer dat hy reeds op Dinsdag, 10 April vanaf Riversdal na Groot Brak geryloop het. Volgens hom ken hy die mense by wie hy aangeklop het in Groot Brak. Die inwoners sê egter dat hulle nie weet wie die kind is nie en die polisie is in kennis gestel.”
Marais sê kst Laurianne Botha het inligting opgevolg en met Riversdal-polisie in kontak gekom waarna die seun weer aan sy ma in Riversdal terugbesorg is.