Wees iemand se held
Annemie de Graaff en Franciska Olivier, albei in graad 10 by Hoërskool Punt, het ‘n projek geïnisieer by die skool genaamd WISH (Wees Iemand Se Held).
Die projek behels onder andere die insameling van kruideniersware vir minderbevoorregte leerders in die skool en hulle gesinne.
Die leerders sê: “Ons is oorweldig deur die vrygewigheid van Hoërskool Punt se leerders en ouers en kon reeds baie gesinne daardeur help. WISH bedank elkeen wat sover ‘n bydrae gemaak het. Ons waardeer dit opreg.” Die meeste van die kruideniersware wat ontvang is, is reeds uitgedeel aan minderbevoorregte leerders in die skool en hul gesinne. Enige oorblywende kruideniersware gaan versprei word in die gemeenskap.
Die geld wat ingesamel is, word gebruik om die kruideniersware aan te vul.
Ouers en leerders wat aangedui het dat hulle maandelikse of kwartaallikse bydraes wil maak, kan dit in die kratte voor me Van Staden se kantoor kom plaas of die geld by haar inbetaal. Merk asseblief alle bydraes duidelik met die betrokke leerder se naam en klas.