Nuwe bestuur vir Eden-jukskei
Op Saterdag, 14 April, het afgevaardigdes na die algemene jaarvergadering van die Eden-distrik jukskeifederasie in die Hartenbos-jukskeiklub vergader om hul bestuur vir die 2018/2019-jukskeiseisoen te kies.
In die omgangstaal sal die toegekende en algemene erkende van jukskei in die Suid-Kaap in die toekoms bekend staan as Eden-jukskei. Die kleure van jukskeie, penne en hemde sal groen en wit wees met slegs die erkende blou wat in die sakwapen opgeneem word.
Die lang witbroek word behou. Met die voorsitter se positiewe en begrypende benadering was daar vloei in die besprekings en het die vergadering vlot verloop.
Menere Dave van der Walt en Desmond Speelman van die Eden-sportraad was teenwoordig en het uiters belangrike en noodsaaklike inligting meegedeel. Ook wat betref die gewysigde grondwet, soos verlang word deur die sportraad, kon hulle insiggewende voorstelle maak.
Die verkose bestuur van Eden-jukskei sien soos volg daaruit:
Voorsitter: Hendry Gerber (Mosselbaaiklub) - skakeling met Wes-Kaapse federasie.
Ondervoorsitter: Bossie Boshoff (Hartenbos-klub). Veterane: werwing en ontwikkeling met Emmice Prinsloo (vrouewerwing). Sekretaris: Lizette Joubert (Mosselbaai). Addisionele lede elk met ‘n toegewysde portefeulje: Jan van Dyk (Riversdal) – program en rekordhouding; Barry van Schalkwyk (Riversdal); Johnny Coetzee (George) - juniors: werwing en ontwikkeling; Sydney Stopforth (Hartenbos) - afrigting en hulpverlening aan beginners.