Ligaspan slaggereed vir Saterdag se kragmeting
Die eerste skote in die Suid-Kaap-liga klap op Saterdag, 21 April. Ons Mosselbaai 2-span reis na Oubaai waar hulle teen Pinnacle Point sal kragte
meet. Die volgende spelers is aangewys om hulle staal te gaan toon. Pierre Meyer (kaptein), André Middel, Roelof Engelbrecht, Roelof Combrinck, Werner Bekker, Michael Parker, Jacques Budricks en Ernie Olivier. Hoë verwagtinge heers aangesien dit ‘n ervare en beslis ‘n baie gedugte span is.
Woensdag het 154 spelers in koel, winderige omstandighede mekaar die stryd aangesê in die beterbal syferpluskompetisie. Die oggendveld het minder wind ervaar en die wenners het dan ook vroeg hulle kleim afgesteek. Gary Rule (arend op nommer 11) en Thys Greyvenstein het van meet af die pas aangegee en na die uittel was hulle die wenners op +13.
Tielman Breedt wat deesdae meer gereeld by die klub gesig wys, het saam met sy besoeker maat, Johan Erasmus, as naaswenners uit die stryd getree.
Die gedugte man-en-vrou-kombinasie van Francois en Hannelie de Villiers het op +12 seker gemaak die derde plek behoort aan hulle. Die vierde en vyfde plekke het onderskeidelik aan Michal Rehr en Riaan Schenck (+10) en Ferdie Jonck en Anton Izaakse (snr) (+9) gegaan.
Saterdag
Die heerlike herfsweer het Saterdag, 14 April verseker dat 148 spelers aan die gewilde vierbal alliansie-kompetisie deelgeneem het. Spanwerk was van deurslaggewende belang en hier het die vierbal van Pat Good, Dave Steward, Wayne Mitchell en Nick Weideman hulle goed van hulle taak gekwyt. Hulle gesamentlike poging het aan hulle 95 punte besorg en dit het verseker dat hulle die louere inoes. Stewige weerstand is deur A Middel, R Engelbrecht, D van Zyl en W Schoeman (94 punte) gebied. Die derde plek op 94 punte het aan vier veterane naamlik H Klopper, E Engels, L de Jager en C Vorster op 93 punte gegaan. Die spelers wat vir die derdebeen van die Kampioene van Kampioene gekwalifiseer het, het Saterdag geleentheid om vir die finaal te kwalifiseer. Die name is op die kennisgewingbord so maak asseblief seker dat jy aan Saterdag se individuele stableford kompetisie deelneem. Op Dinsdag, 1 Mei vind ons jaarlikse Sanlam Kankerdag plaas. Dit is ‘n verdienstelike saak so maak vroegtydig seker van jou inskrywing. Heerlike gholf en kameraadskap word u toegewens vir die volgende week.
Die spelers wat vir die derdebeen van die Kampioene van Kampioene gekwalifiseer het, het Saterdag geleentheid om vir die finaal te kwalifiseer.