Vere word reggeskud vir vakansie
Mosselbaai-munisipaliteit het verteenwoordigers van die onderskeie buurtwagte, ander gemeenskapsorganisasies en toerisme-instellings by vanjaar se seisoenmoniteringskomitee betrek. Die eerste vergadering van die 2018-seisoen het op Donderdag, 11 Oktober onder leiding van die uitvoerende onderburgemeester, raadslid Dirk Kotzé plaasgevind. Dit is die seisoenmoniteringskomitee wat tydens die somervakansie daagliks byeen sal kom om die uitstekende dienslewering waarvoor die dorp allerweë bekend is, te verseker. Mosselbaai spog met vier Blouvlagstrande en lewensredders sal oudergewoonte op hierdie en ander gewilde strande ontplooi word. Munisipale en ander wetstoepassers sal weer eens bygestaan word deur die onderskeie buurtwagte, en verkeersvloei op veral Louis Fourieweg weer deur spesiale, opgeleide hulp gefasiliteer word.
Deur die loop van die jaar vergader die onderskeie munisipale afdelings weekliks op Vrydagoggende om tydens die normale dienstemoniteringskomitee op soortgelyke wyse te verseker dat munisipale dienste seepglad verloop. Beide komitees vergader onder die voorsitterskap van mnr Joubert Coetzee en word onder meer deur die munisipale bestuurder, advokaat Thys Giliomee, direkteure en raadslede van die uitvoerende burgemeesterskomitee bygewoon. Die publiek se samewerking word gevra om munisipale diensteprobleme tydig te kommunikeer om so gou as moontlik aangespreek te word. Probleme met munisipale dienste kan telefonies (044 606 5000) of na die munisipaliteit se SMS-lyn (44820) deurgegee word.
Alle probleme wat ontvang word, word rekenaarmatig vasgelê en deur die onderskeie afdelings hanteer. Probleemgevalle word by die dienstemoniteringskomitee bespreek en, waar nodig, geprioritiseer en op gekoördineerde wyse word verseker dat dit aangespreek word.