Departement praat oor skole en Covid-19
Sedert die uitbreek van die koronavirus het skole op Mosselbaai ook onder die effek van die virus deurgeloop.
Erika Primêre Skool en Indwe Sekondêre Skool is die mees onlangse skole waar 'n leerder positief getoets het vir Covid-19. 'n Beroep is via sosiale media op ouers gedoen om by die skool bymekaar te kom en te eis dat die hele skool gesluit moet word. Maar, volgens die beleid van die Wes-Kaapse Onderwysdepartement (WKOD), moet skole nie noodwendig sluit wanneer 'n leerder of onderwyser positief toets nie.
Afbaken
Woordvoerder vir die WKOD, Bronagh Hammond het bevestig dat slegs 'n gedeelte van Erika Primêre Skool afgebaken is om ontsmet te word terwyl Indwe vir 'n dag gesluit was.
Met die pandemie wat nog sy piek nader en al meer leerders wat teruggaan skool toe, is dit te wagte dat nóg skole op Mosselbaai in die nabye toekoms waarskynlik dieselfde prosedure sal moet volg.
Protokol
Volgens Hammond moet 'n volledige protokol gevolg word indien 'n positiewe Covid-19-geval by 'n skool bevestig word. Sy beklemtoon egter dat 'n bevestigde geval nie noodwendig vereis dat die skool moet sluit nie. "In elke geval sal sekere faktore in ag geneem word in die besluit wat geneem word." Eerstens moet die areas waar die personeellid of leerder fisies teenwoordig was, ontsmet word. Hammond sê wanneer 'n personeellid byvoorbeeld slegs in twee klaskamers was, die res van die skool steeds kan voortgaan en slegs daardie vertrekke word dan ontsmet. "Maar wanneer die persoon in ander klaskamers op die terrein was, sal meer gedeeltes van die skool afgebaken moet word."
Tweedens is die datum waarop die personeellid of leerder by die skool teenwoordig was van belang. "Die departement van gesondheid het vir ons gesê dat die virus nie vir langer as 72 uur op 'n oppervlakte kan oorleef nie. Indien 'n personeellid vir byvoorbeeld 'n week nie by die skool was nie, is dit nie nodig om die area te ontsmet nie."
Kontakte
Hammond sê die getal van direkte kontakte waarmee die persoon wat positief getoets is, in kontak mee was, moet ook in ag geneem word. "Ons moet duidelik onderskei tussen die teenwoordigheid van 'n nabye kontak en ander kontakte. Direkte kontak behels wanneer jy fisies naby aan 'n persoon was. Dit is belangrik om direkte kontak te vermy. Slegs mense wat in direkte nabye kontak met iemand was wat positief getoets het moet vir 14 dae isoleer.
Hammond sê mense wat in dieselfde vertrek was as die persoon wat positief toets, word nie as 'n direkte kontak beskou nie. "Hierdie mense hoef nie te isoleer nie, maar hulle moet hulself dophou vir simptome van Covid-19.
"Indien slegs 'n klein getal personeellede by 'n skool moet isoleer, is dit nie nodig vir die hele skool om te sluit nie. Slegs wanneer 'n groot getal personeellede moet isoleer, sal dit 'n impak op die onderwys by die skool hê. Sou dit gebeur moet toestemming van die departement van onderwys verkry word om 'n skool te sluit."