Help Kansa om te help

Met Mandeladag wat op 18 Julie gevier sal word se spesiale 67 minute om die draai, kan jou donasie Kansa help om 'n verskil in 'n kankerlyer se lewe maak.

Volgens Anina Meiring, spankoördineerder vir dienslewering in die Suid-Kaap en Karoo maak dit nie saak of jy R67, R670 of R6 700 het om te gee nie, jy sal 'n Kansa held van hoop wees.

Vennootskappe met die gemeenskap is vir dié organisasie belangrik en Meiring sê hulle is veral nou in pandemie-tyd baie afhanklik van donasies om hul sorgtuiste in George in bedryf te hou. "Kankerpasiënte bly in met drie etes per dag en word vir behandeling geneem indien nodig."

Op 6 Julie begin hulle ook met 'n telefoonberadingslyn waar opgeleide beraders bystand aan families en pasiënte wat hulp weens Covid-19 regulasies en inperking nodig het, verleen.

Indien 'n finansiële bydrae onmoontlik is, sal hulle volgens Meiring ook enige niebederfbare voedsel en/of voedsel wat gevries kan word, toiletware en skoonmaakmiddels vir die sorgtuiste waardeer.

Kontak haar (044 874 4824) vir Kansa se bankbesonderhede.