Siggestremde en hond deel van landwye veldtog
Covid-19 het meer as net SuidAfrikaners se persoonlike vryheid gedurende die afgelope paar maande ingeperk. Talle diensorganisasies is ook daardeur gekniehalter aangesien hulle fondsinsamelingspogings in die wiele gery is. Baie moes vinnig 'n haas uit die hoed haal om met alternatiewe idees vorendag te kom.
So ook die Suid-Afrikaanse Gidshondvereniging. Amanda Bester, 'n siggestremde vrou van Mosselbaai, vertel dat die vereniging se openbare skakelwerkspan heelparty vindingryke planne uitgedink en geïmplementeer het. Bester en haar gidshond, Reo het aan een van hierdie inisiatiewe deelgeneem.
"Gedurende vlak 4 van die grendeltydperk, is ons uitgedaag om 100 000 treë te stap en om dan ons aktiwiteite op sosiale media te deel." Amanda verduidelik dat die uitdaging behels het dat gidshondeienaars hulle familie en vriende ook kon betrek. Haar familie, vertel sy, het haar poging goed ondersteun.
"Ons het vroeg soggens in Hartenbos gaan stap binne die toegelate oefentyd, maar van die ander deelnemers het later gedurende die dag sommer op hulle trapmeul tuis gestap. Ons het 'n week gehad om die afstand te voltooi."
Volgens Bester het die vereniging met dié landswye poging meer as R200 000 ingesamel.