Identiteit van oorledene bekend
Die naam van die voetganger wat tydens 'n vragmotorongeluk op Woensdag, 24 Junie op die Robinsonpas doodgery is, is intussen bekend gemaak.
Hendrik Claase (46), inwoner van Ruiterbos, is deur die vragmotor raakgery en die bestuurder van die vragmotor het daarna sowat 250m verder die pas af, beheer oor die vragmotor verloor. Gevolglik het die vragmotor op 'n skerp draai omgeslaan.
Volgens kaptein Wollie Fourie, kommunikasiebeampte van die Da Gamaskop-polisiestasie, is 'n saak van strafbare manslag teen die bestuurder van die vragmotor, Raymond Chiwangira (39) gemaak. Chiwangira was vir drie en 'n half uur in die vragmotor vasgepen en nooddienste het sy bene later bevry. Hy is na die provinsiale hospitaal in Mosselbaai geneem waar hy vir 'n beenbreuk behandel is. Sy passasier, Frank Munemo, is net na die ongeluk deur paramediese personeel op die toneel behandel en na die hospitaal geneem. Hy is dieselfde dag weer ontslaan.