Totsiens aan pont
Die ou pont wat vir soveel jare 'n landmerk op Malgas was, gaan sonder twyfel plek vir 'n moderne, gemotoriseerde weergawe maak.
Die ou vaartuig is Woensdag, 24 Junie uit die rivier gehaal en eenkant neergesit. Heelwat inwoners het hul hartseer oor die verandering op sosiale media uitgespreek, omdat die pont vir baie mense aangename herinneringe inhou.
Suid-Kaap Forum het verlede jaar oor 'n petisie wat deur die burgemeester, Nicholas Myburgh, begin is om die vervanging te keer, berig. Volgens Myburgh is verlede week se verwikkeling 'n verrassing vir hulle. "Tydens my vergadering gedurende Oktober 2019 met die provinsiale minister van vervoer is belowe dat niks sal gebeur voor 'n oplossing by wyse van openbare deelname gevind is nie. Dis bevestig tydens die minister se ter plaatse inspeksie op 25 Februarie hierdie jaar. Intussen is alle ondernemings en beloofde prosesse oorboord gegooi. Die ou pont is summier verwyder en uit diens gestel."
Myburgh sê meer as 21 000 mense het die petisie onderteken, maar dit tel skynbaar niks vir die departement nie. "Daarvan het net dadels gekom, ten spyte van al die beloftes."
In sy kommentaar het Jandré Bakker, hoof van kommunikasie by die Wes-Kaapse departement van vervoer gesê die SuidAfrikaanse maritieme veiligheidsowerheid het die ou pont onveilig verklaar en daarom is dit verwyder. Hy het benadruk dat geen besluit oor die toekoms van die ou vaartuig nog geneem is nie: "Alle riglyne van die Suid-Afrikaanse agentskap vir erfenisbronne sal gevolg word, maar veiligheid was die hoofoorweging. Die ou vaartuig het die einde van sy dienslewe bereik."
Bakker sê voorts die nuwe pont sal eers in werking gestel word wanneer inperking vryer beweging van mense toelaat. Die nuwe toevoeging is dubbel die grootte van die oue en landboutoerusting en konstruksievoertuie sal ook daarmee oor die rivier vervoer kan word.