’n Suksesvolle jaar vir Stilbaai Sakekamer

Stilbaai Sakekamer het 'n jaar vol opwinding en 'n paar eerstes agter die rug, aldus voorsitter Rachel Wall.

Die sakekamer se jaarvergadering is onlangs per e-pos afgehandel, omdat inperkingsregulasies fisiese vergaderings verbied het. Wall reken die hoogtepunt was ongetwyfeld om as die AHi Wes-Kaap se sakekamer van die jaar aangewys te word. Ander sake waarmee die bestuur ingenome is, is 'n lidmaatskapgroei van 22% en meer belangstelling in hul byeenkomste.

Nuwe aktiwiteite wat die eerste keer plaasgevind het, is onder meer 'n finansiële werkswinkel wat aangebied is, die vestiging van 'n sakebiblioteek en die bedinging van 'n spesiale aanbod vir digitale mediadienste aan lede.

Wall sê hulle het ook in die afgelope jaar 'n sigbare teenwoordigheid in verskeie forums soos die 2020-2021 geïntegreerde ontwikkelingsplan hersieningsproses gehandhaaf en gereelde vergaderings is met Hessequa-munisipaliteit gehou.

Die bestuur vir die 2020-2021 termyn is Rachel Wall (voorsitter), Tertius Haak (ondervoorsitter), Johan Kok (tesourier), Heléne Strauss (sekretaris), Maarten Roode, Willie Delport, Johan Kriel, Francois Smit en René Haarhoff.