Sosiale media herenig familie
As jong meisie wat op die eens klein Vrystaatse dorpie, Welkom grootgeword het, het haar liefde vir diere daar begin en het dié passie haar beroep geword.
Gerda Reynders, koördineerder van die Dierebeskermingsvereniging (DBV) se Mosselbaai-tak, stap al 'n lang pad saam met die DBV. Sy het in Welkom eers as ontvangsdame gewerk en daarna, nadat sy gekwalifiseer het, as jong inspekteur.
Sy verhuis na George en werk die afgelope sewe jaar as inspekteur by die Mosselbaai-tak. In Januarie vanjaar neem sy die leisels as takkoördineerder oor. "Ek wil graag die tak opbou om een van die beste DBV-takke te word," vertel Reynders. "Ons het baie uitdagings soos die dragtige teefhond wat ons aan 'n boom opgehang gevind het. Ongelukkig het ons nie die skuldige gevang nie."
Volgens Reynders gaan dit finansieël altyd moeilik, veral tydens die Covid-19pandemie. "Die gemeenskap se hande is altyd oop wat kos betref, maar lopende uitgawes soos salarisse, instandhouding, water en ligte, voertuigonderhoud en brandstof bly 'n groot uitdaging," sê sy.
"Ons het ook op BackaBuddy gaan registreer vir 'n sterilisasieveldtog sodat die publiek kan geld skenk deur op ons Facebook-blad die skakels te volg. DBV Mosselbaai het ook 'n permanente veearts en assistent aan diens en gaan hulle die bestaande kliniek eersdaags vergroot."
Die DBV is die enigste dierewelsynsorganisasie in Suid-Afrika wat deur wetgewing gereguleer word (DBV Wet 163 van 1993). Die inspekteurs is ook by magte om diere ingevolge die Dierebeskermingswet 71 van 1962, asook die Wet 24 van 1935 (Beskerming van Gedresseerde Diere Wet), te konfiskeer en kriminele klagtes teen oortreders aanhandig te maak.
'n Vrou wat in die vroeë 1980s uit Mosselbaai agter werk aan getrek het is danksy 'n onlangse plasing op sosiale media met haar familie herenig.
Maria Marks het op Sondag, 5 Julie haar 82ste verjaarsdag in Stellenbosch gevier waar die Korras-egpaar haar onder hulle vlerk geneem het.
Marlene Korras vertel dat sy Maria in die negentigerjare op 'n plaas op Stellenbosch ontmoet het waar hulle albei werksaam was. Sy het toe glo gesê dat sy van Mosselbaai afkomstig is, maar dat sy kontak met haar mense verloor het. "Maria het basies my drie seuns help grootmaak." Marlene sê dat Maria altyd vertel het dat sy destyds uit Mosselbaai verhuis het saam met 'n blanke gesin by wie sy werksaam was. Volgens Marlene het hulle onderneem om haar "eendag met die bus" terug te stuur Mosselbaai toe, maar dit het glo nooit gebeur nie.
Nadat die twee vroue se paaie aanvanklik geskei het, het Maria later met Mina Korras, Marlene se skoonma bevriend geraak. Dié twee boesemvriendinne het later 'n woning gedeel. Mina is in 2013 oorlede, waarna Marlene en haar man, Jafta Maria sedert 2014 by hulle in Ida's Valley huisves.
Maria het vanweë 'n besering haar sig verloor, maar sê Marlene, sy was nog nooit vir hulle moeite gewees nie. "Sy doen nog alles self en is glad nie 'n sieklike mens nie."
Sosiale media
Marlene het soos Maria van haar verlede vertel het, notas gemaak van die name en plekke wat sy genoem het. "Sy het die laaste tyd dikwels as sy so sit, hartseer geraak en gesê sy wonder so oor haar ma en haar kinders. Dan noem sy hulle name en sê sy verlang so."
'n Familielid van die Korras-gesin, Dawid Coetzee ook van Ida's Valley, het op 2 Julie 'n plasing op die Facebookblad, Mosselbaai op sy BESTE gedoen met die inligting wat Marlene neergeskryf asook 'n foto van Maria. "Dawid het altyd gesê ek moet dié goed vir hom gee en hy is mos nou slim met die internet. "Binne 'n japtrap was daar reaksie en is Maria se familie opgespoor.
'n Susterskind van Maria, ao Tata Marks verbonde aan die polisie se eenheid vir gesinsgeweld, kindermishandeling en seksuele misdrywe op Mosselbaai, gaan haar eersdaags in Stellenbosch haal. Sy ma, Annie is diep geraak deur die eerste nuus van haar verlore suster na soveel jare. "My ouma Dina is op 99 oorlede. Sy het gesterf met die groot begeerte om weer haar dogter, Maria te kon sien. Sy het al die jare vas geglo dat tant Maria nog lewe, terwyl nie een van ons geweet het of dit wel so is nie. Sy was toe al die tyd reg."
Marlene Korras sê dat hulle baie swaar van Maria gaan afskeid neem. "Sy is so deel van ons familie."